聖誕節

我並無宗教信仰，我对聖誕節的熱情卻未因此而冷卻，可能比一些受到教條約束的教徒更加無區無束地去盡情享受依個普天同慶的日子。無論生活幾咁難捱難過，我覺得，有如此佳節去冲喜一下，讓人同至愛家人朋友暫時拋開煩惱去享受一下人生，又真係幾咁開心快樂。

由我自懂性那天，每一年的聖誕都係好開心好快樂咁渡過，有錢如是，無錢亦如是。開心愉快喜悅是那一份安寧平靜，和諧感恩的心景，一剎那無仇無怨，心胸放開，海闊天空。就算今年2011英國受歐債危機和經濟衰退影响，只要聖誕臨近，許多許多人和我一椂都拋開煩惱，全家上下一心準備迎接依個聖誕大日子。

小孩子就係聖誕節最受惠的一群。我三個女兒，尤以七歲的嵐嵐和八歲的汶汶最緊張同最期望。十六歲的彤彤同她朋友們都有自己的天地，扮靚去街，興奮不已。而Helen亦好積極參與，置身其中。小的為家中佈置，粉飾，包裝礼物，發送聖誕咭。Helen亦忙著買家人朋友的聖誔礼物。她最享受的就是為家人做一豐富多彩的聖誕大餐。一两星期前已忙著到超市購買最好之食材，甚麽火鷄胸，火腿，三文魚，大蝦，牛扒等竽，應節糖果餅食都以「上倉咁上」大手大手咁買，連车房個冰箱都放滿。好彩英國聖誕時間天气寒冷，許許許多多的食物都可以放在玻璃屋，绝無問題！

今年聖誕，友人陳偉靈的女兒Iris由University of Plymouth上來渡假，於是乎更添熱閙氣氛。

我的啤酒批发和超市生意於聖誕期間最忙碌，生意是平日的兩倍。做得辛苦但是開心。我明白到忙碌完後，可以靜下來，同家人一起開心歡度佳節。

小時聖誔節都有爸媽兄弟姊妹一同慶祝，爸爸不在，兄姊妹各有各移民，各有各的發展。再走埋一起歡渡聖誕的機會微乎其微。話雖如此，但仍然是我每年聖誕的一個願望。

謹在此裡祝願世界和平，人人聖誕快樂！

一生難忘

我的Blog，經常寫我以故的爸爸，沒有提及还健在的媽咪一字。相信以下發生於媽咪和我的事，对我來說是「一生難忘」。

我十一個月大時，我媽咪就將我由鬼門關拉我番黎嘞。我不滿一歲，正在學行，半爬半行。爬到茶几，就扶着站起。好衰唔衰，個茶几上放了一個只有塞沒有蓋的熱水壺，個壺受不了我在下面的搖拽擺動，就倒了下來，熱水迎頭倒到我細小身驅，當場差不多把我燙熟。我並沒哭，媽媽也叫不出声，只是我昏倒過去而則媽媽慌亂失声。

大難不死，有三個主因。第一，燙水沒有由頭頂倒下，只是由頸項開始，所以傷痛疤痕只留在頸，胸口，腹和右手內側。我的俊俏面孔〔？〕和我日後做人幸福〔腹部以下〕都沒受影响。第二，由于事發時是冬天，我穿了小棉襖，抵擋了不小燙水，並無全單照收，否則後果堪虞。第三，亦是最關鍵的一個原因。雖然事發突然，电光火石瞬息之間，媽媽作了一個，她到今日都引以自豪的決定。她二話不說，就飛奔地抱著我衝到街上，跳上計程車，沒有計较金錢是否付担得來，就奔馳到六十年代的私家医院去，应診的那位医生，叫張英傑，媽媽叫我不要忘記。

媽媽見我不作声，她真的以為我死了。她只懂得哀求医生救命。日後我跟她談起，她直認，那一刻，她甚麽也沒有理會了，錢財不重要，她生命也不重要，重要的是「救番我」，亦從無放棄我，很正面，很樂觀。講到這句，我只有無言感激！

媽媽跟我講，張医生用利剪剪開小棉襖時，我燙熟的皮也一起撕了出來了，惨不忍睹！

可能蒼天有憐憫之心，不知甚的我居然被救了回來。不負媽媽一片苦心。

日後如是者，媽媽都抱著我到医院覆診换藥，好不費心。

上天添我這個痛苦，那時我小得連丁点兒印象都無，又何來講痛苦經歷呢？相信最痛心欲绝的是我媽咪。此事留給我的就只有疤痕，提醒我媽咪為我作出的照顧愛護。自少的我，不知不覺就愛跟着媽咪，有時我亦想法子去討好和取悅她。外人看來我和媽咪就是這樣建立了「受寵愛的拉仔」吧了。爸爸打笑的說我是一個「裙腳仔」。我是在兄弟姊妹中最愛親媽咪面頰的一個。到現在她已年過八十了，我見面和再見時，我都堅持這個親頰，這可能就是上天給媽咪和我的示愛方式吧！

這次意外，媽媽總有少少責怪到那時只有八歲的二家姐身上。事實上八歲的姐姐也極需要別人照顧，又甚可以去照顧我呢？希望二家姐不會為此事在心中留下烙印好了！

相片拍於聖誕節八十年代佐敦舊居

歐債危機

自08年金融海嘯後，歐美等國經濟一跌不起。我以為，好似以往，三兩年間可以回復原氣，收復失地，經濟慢慢重上正轨。希望還希望，事實歸事實。到今日，剩睇杜指，倫敦FT Index，日本Nikki Index和香港恒指，每況愈下，尤以依兩三個月，希臘国債危機，加埋意大利步其後塵，有後來居上之勢，攪到個股市好似坐「下衝過山车」一樣，大落小上。歐美經濟唔好，一定禍延亞洲，不能独善其身。強如中國，恐怕出口受挫，打擊經濟增長。香港財經事務局就報定案，話如果情況冇改善，在中國的制造業港商，有約一成半会倒閉，情況不容樂觀！


今日，我不是係度研究經濟不景課題，事實上我亦冇咁嘅「料子」！我只不過以一個居英小港人的身份，以自己有約二十年進出口和国际貿易經驗去探討一下，今天歐洲經濟一蹋糊塗的現狀。


英法德和歐洲等國於十八世紀開始工業革命，十九世紀工業发展如日當中，至二十世紀，二次大戰，南北韓戰和越戰後，跟隨中國經濟開放改革後，生產命脈轉向亞洲东南亞各國，資金东移，勞工密集工业一窩蜂湧去亞洲，尋找低成本勞工，歐洲各工業大國享受那短暫的經濟效益，于是它們制造業開始走下坡，尤如夕陽西下。其實自二次大戰後，歐洲經濟已開始積弱，國庫空虛，生產力大减，經濟如一池死水，歐民貪圖安逸，不事生產，亦不願與亞洲小国競爭，还攪甚麼保护主義如關税和進口配额等等以暫時舒困。佢地一直都食緊阿爺阿爸於稙民時代和兵艦霸权掠奪回來嘅「老本」啫！加上六十，七十年代崛起的嬉皮士思想和個人主義抬頭，玩樂主義當道，對資本主義成效的貭疑和社會福利主義「斬腳趾，避沙虫」的思維興起，許許多多人民都係咁過着樂此不疲和習以為常的「有政府冇翳蟻」慣性生活，並且感覺無乜唔妥，理所當然心態。政府官員貪婪高身厚職亦為了自保，取悅民心爭取票源，不惜為國舉債，借貸渡日，苟且偷安，「做一日和尚打一日鈡」啦。試問边有咁好彩，國難一關又一關咁「則則膊唔多覺」過吖？咁樣咪如同碌信用咭抵信用咭數一樣。上得山多终遇虎，終於冇人肯信肯借，班友咪責無旁貸咁整套「大龍鳳」攪到債務違約，信用破產。仲要求個亞媽「歐盟」動用其他國納稅人的錢去救亡喎！請問救咗希臘，再救意大利，仲有葡萄牙，西班牙排緊隊。其實法國，德國和英國都唔係好掂架！唔駛幾耐又到佢地叫「幫手」哪，事關幫得依個就要幫埋嗰個嘞！依套正正係西方人「人人平等」嘅理念吖嗎？


其實歐美諸國都曾「發奮圖強」利用佢地嘅「財智」來番身架。講番九七年金融大鱷就用「財技」來亞洲股市外滙市場搶錢。那時攪到亞洲人冇啖好食，足足黃面佬做咗幾年先至「止血」走出困局。可惜一不可再，歐美狂徒以為08年再重操故技，再執一「濟」但事以願違，亞洲受牽連有限，一两年就冇事重拾正轨。相反歐洲美國就自己「捉虫」嘞，債台高築，英國個「北方盤石」同「皇家蘇格蘭銀行」為求高息回報，大胆地超過度借貸于「不安穩健債務」，要英政府動用国庫〔即係人民嘅錢財〕泵水去救火。加理美國佬好嘅唔學，自己有「雷曼兄弟」班高層為咗份年尾花紅獎金，唔生性亂咁投資，攪到損手爛腳。仲有「房利美」個楼宇次按冇人还款大包袍咪越攪越差。而家歐美人民对一向引以自豪的强大經濟金融体制開始懷疑和失信。最近有衝擊华尓街和倫敦金融區運动，反对財金高官要員貪婪。到現在還進行緊！依舖都唔知又点收科嘞？


講咗咁耐，我都係想話依個世界上係冇「免費午餐」和力不到不為財的道理啫！歐洲人係百多二百年前工業革命，創新科技，發展航海事業，拓展植民政權等等，唔好講政治是否正確先，佢地咪靠一双上天富與的手去創做事业，機遇，財富同新天地吖？而家亞洲人中国人有嘅錢財，歐洲人咪一早有咗，不過佢地唔珍惜冇save it for the rainy day，係依百多年來「洗腳唔抹腳」咁，窮奢極侈開大水喉猛咁射猛咁fing，最惨係見到棺材都唔識流眼淚，幾多億萬兆萬都洗窮洗崛啦！記得早四五十年前，所有歐美制品都叫「來路貨」，依個名認真誇啦啦！品質好，耐用，物有所值之意。他們咪靠著双手，出口世界各地他們引以自豪的各种貨品，事實上歐美品牌到今時今日仍然為人愛戴樂用。瑞士名錶、德國名车，法國時裝，意大利皮具，英國呢絨布匹，歐洲美食等等都一一叫座又叫好。歐美人係有此能力來創造出好嘅貨品，建立市場和累積財富，只不過現在大部份歐洲人都愛理不理，插著双手，寧願領取社會救濟都不事生产。加上政府縱容子民，「唔好大教壞細」咪係咁延續下去囉！本來開始時係十個煲九個蓋，边個「水滾」便蓋着边個先啦，搅吓搅吓，煲蓋又打爛，個個煲又「滾卸」出黎，終於咪爆煲滾卸晒囉！


双手係人類最用得多最能幹最效用高的肢體，個腦去諗啫，但都係靠双手造做出黎。我們唔用佢咪浪費咗对手囉。用把口去講係冇用嘅，英語都話「action speaks louder than words」，不過，只可惜连講嗰個都唔肯去做呢！有人話：「精人出口，笨人出手」，但係亦有句話：「精嗰個，死嗰個」。「愚公移山」裡，愚公除親力親為外，他的子孫也一樣用双手用毅力將個大山移走，福澤萬世！

我大学畢業後就投身進出口行業。「物離鄉驕，人離鄉賤」就講出一個國家要利用它自己的資源加上本身独有技術創造貨品，建立优勢，出售他國，發展海外市場，賺取外滙，然後帶动內銷，平衡貿易盈虧。不可能每天「等運到」靠腦力〔佔人便宜行古惑〕，靠食力〔食埋人個份〕和卸力〔卸膊唔面对〕去揾食架嘞！十三年前來「英」至今，我都係用双手勞力去建立自己事业。有人謂：「我不懂善用資源，攞苦來辛啫！」但我就從不後侮，殊途同歸罷了。

失去了....才知它的珍貴!

離開了我們已十二年的爸爸，他現在在那裡呢？媽媽和我們仍然十分掛念他。

初初，想起爸爸，不時暗地裡落淚！時光飛逝，無改对他的思念。只不過由以前的逃避和悲傷，变為現在的面对和懷念珍惜罷了！

這一幀相是我記憶裡第一幀「全家福」合照，想是六十年代尾，六八，六九年冬季罷。

當天，对我們小的來說，是一件天大喜事。到影楼拍照和外出用饍於六十年代，对我家來講是一件十分之奢侈隆重之事。

相內，男的全穿上洋服，我都不清楚媽媽從那裡找來那麽多華麗西服了。据我估計，应該是爸爸的陳姓富有「霧水契爺」他的兒子送給我們罷！記得媽媽隆重其事，於當天不断說，「要我們做少爺仔，要穿西服！」。爸爸亦不知從那裡買來了三個領帶夾和西裝襟針，我們三兄弟就頓時成為當晚好不威風的「盧家大官，二官和細官了」！

女的就受當年林鳳，雪梨，嘉玲，江雪或後期的陳寶珠，蕭芳芳和薜家燕的影响，穿的都是窄腳西褲，花恤衫和少女們不可或缺的「亞米茄」頭夾了！

當晚，一家盛裝，浩浩蕩蕩由佐敦道步行至位於現址為恆豐中心的一群由佐敦彌敦道口，一直伸延至柯士甸道口〔現址為Bossini〕的戰前建築物之上的「光光攝影院」。那群西式建築，外表一致，井井有條，不高不矮的排列著、。全排屋都由微黃碎花石建成，向彌敦道那面，每楼都設有陽台外露，所有畢直高企的麻石楼梯，就帶人走上二楼、三楼去。「光光」就設在二楼之上。

主理「光光」的是「蘇先生」。蘇先生是不是老板就不清楚了，但他拍出來的相片我家就十分滿意，不然就不會光顧他幾十年嘞。最近那次見蘇先生已是十二年前之事了，就是四哥於九九年頭結婚擺酒宴的一次，他就幫我家拍了最後的全家福照片，爸爸同年八月辭世！

六十年代，拍家庭合照殊不簡单，随了用錢外，更要飾心打扮，取得效果。用菲林拍照，每一張照片都要洗費，越多拷貝就越貴。當晚拍照時，我們一家都十分緊張，無他，少机會和不許閃失！

对於我們六兄弟姊妹來說，其實當晚戲肉是那頓豐富的晚飯。可能那時爸爸最愛的伯爵酒楼仍未開幕，愛吃的爸爸就選擇了當年緊次於九龍區一哥「半島」的新樂酒店吃晚飯嗱！上酒店中餐廳吃飯，真羨煞旁人呵？「Shamrock Hotel 新樂酒店」於六七十年代很出名，和灣仔的「六國飯店」，尖沙咀的「美丽华」齊名，平起平坐，「卡士」不分上下。現在的新樂仍屹立不倒，仍招呼國內和東南亞旅客，雖然它風采不再，但那份舊日情懷依然！有宗關於新樂酒店的大新聞就是它的老板曾被綁票，閙得滿城風雨！但我記不起結局如何了！

那次晚飯，只有幾歲的我有兩個很深刻印象。第一，飯廳內燈光幽暗，氣派高尚。第二，就是那張白色半桶形的餐椅，柔软舒適，坐了上去，小小的我就給它整整地包窩着了。很喜愛，很優越，很新鮮。那晚吃些甚麽，我一丁点兒都記不起，相信有「肥仔永年」之稱的三哥會比我清楚得多吧！反而我記得回家途中，爸媽就買了些「甜筒」和「蓮花杯」雪糕，边行边吃，，，

這些点点片段都是我快樂回憶，此情不再。每次看到相片，心裡總是甜甜酸酸的，悲喜莫名，眼汎淚光。不是傷感，只是欣慰感激爸媽賜給我們一段快樂時光，好好珍惜！

曼聯精神

〝Theatre of Dreams〞就是Old Trafford，曼聯主場的別號！点解？洋人有謂：「Follow your dream and your dream comes true」。事實上，曼聯主帥Alex Ferguson費Sir和他一手孕育出來，九十年代所向披靡的英藉大軍「堅尼，碧咸，史高斯，傑斯，利維爾兄弟，畢特，巴里斯特和艾雩等等，贏到本土和海外的無國界支持。過去卄五年來，費sir 有起有跌，承受巨大無比壓力，一次又一次輸咗又贏番，他証明了亦体驗了「只要有夢想，夢想可成真」的永恆道理！為曼聯立下十九屆英超冠軍里程碑。一切一切都無從置疑！人的脑海記下來，足球歷史亦寫下來，千秋萬世，為人歌頌，永垂不朽 Glory Glory Man United 非浪得虚名，實置名歸!


本文並非為曼聯「揚刀立萬，大吹大擂」，只不過是想藉此講出「曼聯精神」和曼徹斯特市同曼聯擁躉的微妙關係是也！


三，四十年前，曼徹斯特城，只不過係英國第六大城市。由电話編号可見一斑。伯明罕市是0121，利物浦是0151。意謂伯明罕是第二大而利物浦則第五，曼城只是第六(0161)。曼城過去三四十年間，突飛猛進，銳意經營，經濟起飛，外資湧入。就尤如亞洲四小龍一樣吧！重大基建就有M60環迴公路，曼城國际機場為全英第四大，直迫倫敦第三Stanstad。Trafford Shopping Centre為全歐最大，倫敦的 Westfield 都比了下來。經濟效益為£1.65billion。曼城地產物業，除了倫敦為一哥外，曼城週边地方如 Hale, Bowdon, Wilmslow, Prestbury & Alderley Edge 都很昂貴，過千萬豪宅随處可見，民殷物阜是也！市內亦設有 Metro Rail 跟澳洲 Melbourne 的Mono Rail 地上鉄相似。据聞這個鉄路的興建與曼聯亦有淵源，若有賽事，此鉄會特地接載球迷，停 Old Trafford 站，特為曼聯而建。曼聯 Old Trafford 主場賽事，經常有八萬觀眾之多呢！曼聯奧脫福主場，不知不覺，漫不經意地成為旅遊地標。球迷，非球迷，悉唔悉曼聯都會來朝聖，一睹曼聯雄霸英超卄五載的傳奇風采！差不多有「不到長城非好漢」異曲同工之妙！信與唔信都好？曼城和曼徹斯特大學也因曼聯足球會效應影響下，知名度也大大提高！有人打趣話，曼徹斯特應是英國足球首都呢！


查實，曼徹斯特城在十八世紀，係一個工業城鎮。绝大多数人都是勞工階層，跟倫敦的政經工商中心截然不同。以往工人無乜娛樂，於是乎看足球就理所當然成為佢地的娛樂運动了。曼聯也曾降班，有起有跌。但近卄五年來，戰績彪炳，久而久之，工人就將自己的成就感和喜悦交托比曼聯隊波嘞！曼聯亦不負所托，勝多輸少，成績驕人，10/11年度更勇奪十九次英聯冠軍，為罕有成就的工人們帶來用錢都買不到的喜悦。為平民大眾悲微之心添上無限快慰！試想想，若然香港首富李先生也是曼聯迷，李先生看到曼聯捧盃和一個身為拾荒者曼聯迷感受到的是不遑多讓！人生在世，短短幾十載，試問有幾多件事，可以同十萬八萬個志同道合的曼聯迷在电光火石間，一起雀躍，一起歡呼，為自己的夢想和成就，無分國界，不拘比此，互相擁抱歡呼狂號，享受那件突然喜悅！在今世上，問誰為我做到呢？曼聯是也！一生之中，悲喜交雜，能碰上一隊為你爭光之球隊，難能可貴！


八月卄八日，曼聯对阿仙奴，主場勝8-2。打破歷史紀錄。我身為曼聯球迷置身其中，興奮萬分，能見證此歴史一刻，實在自豪驕傲！

天下無不散之延蓆，年屆七十的費Sir即將離任，許許多多的球迷都為此担心，怕將軍一去，大樹凋零，無人能維持曼聯的光輝歲月！

我則話，能夠享受卄五年來曼聯帶給我的光榮喜悦，不敢奢求了。在此感謝曼聯給我一段豐盛的日子，亦祝曼聯「Long Live Manchester United」。

大女彤彤〔二〕

彤彤係我事業失意那年出世。自從九四年離開DHJ後，大樹好蔗陰的日子不再。


九四年開始創業，係港島堅道做間叫〝Salt n Pepper〞燒鷄店慘淡收場後，兜兜轉轉不知轉過幾多份工啦。直到九六年一月卅日，彤彤出世，以為〝為〞咗個女，修心養性，揾份鉄飯碗，做過馬會投注中心主任亦做過政府人員，諗着好好養妻活兒。但係個心始終有團火，加上「姣婆守唔到寡」，係九六年尾再戰江湖。係英國引入個人清潔沐浴品牌〝Wood of Windsors〞，做代理攪推廣。可惜時不與我，九七金融風暴，市道消條，边有人洗得起錢買高檔次消費品吖。結果又係食白果。九八年九月，心灰意冷，決定離開香港依個失意之地！


一九九八年九月同Helen和只有兩歲八個月大嘅彤彤抵達曼徹斯特城(Manchester, England)，希望重新開始。到步之前，已經安排租落一間外賣店經營，所以帶埋個賓妹來英照顧彤彤。霉運始終揮不走，可能自己真係經營不善，外賣店生意一日不如一日，個賓妹合約滿咗都無力再續。二仟年初，剛滿四歲彤彤，因冇人照顧，彤彤就要在週末和假期，跟我同Helen返舖開工嘞！


四歲嘅彤彤天真活潑，那會喜欢呆着店內看着我工作呢？有時她看看电视或卡通錄影帶，有時自己独坐在牆角的卓上寫吓字，填吓色或作吓畫。由上午十一時悶到二，三点收了午飯時段，跟Helen去行吓街買吓嘢，就算解咗悶。彤彤很小扭計，買她小小糖果或請她坐吓團團轉小木馬，她就開心不得了。如果她有運氣，有時就到友人家裡去玩吓，咁又一晚。這樣生活過了年多兩年。生意不景，令我同Helen都感到不能坐以待斃。客人日日少落去，有時晚上幾近乎無生意，入不敷支地捱了幾個月，我同Helen都十分氣餒。開始信心動搖，想諗別的出路。01年尾，我開始涉足啤酒生意。早上送了彤彤返學後，就返舖子做午市，三点收工就立刻去學校接番個女，送佢番屋企。我星期一至四晚上送運酒水到餐館。Helen星期五六日晚返散工做侍應。就係咁樣兩公婆輪流照顧彤彤。


做咗啤酒生意後，衰運開始漸漸離去。送嘅品种多了，訂單漸多，但始終都未敢肯定生意穩定。有時星期五，六晚都要開工。問題黎嘞！边個去睇彤彤呢？咁嘅情形下，我就迫不得意帶埋個女去送貨！事實上，跟她一起，我會開心些，我亦多個伙伴，兩父女有说有笑。有時她倦了，就在車上入睡，既可愛又可憐。

初做啤酒時，戰戰惊惊。未敢買架大van做。用咗仟多英鎊買咗架「前七」日產Nissan麪包車。一個人霉起黎，樣樣事都比人恰格嗱。架van成日水滾，揸佢時要睇着個温度計同帶着一大桶水，一水滚就要加番滿個水箱radiator。有時熱過龍，連條運水喉都會迫爆穿崩架！


十一月某星期五晚上，已經踏入深秋的英國，夜幕四時多已降臨。晚上又要帶同彤彤外出送酒。正如所講，訂單多了，時間緊迫，週末時，許多餐館要求五時前送至，所以我份外緊張煩燥。好衰唔衰，架死「前七」又在半路「水滚」，跪地唔郁。落車想去入水比佢飲啦，佢又庆烚烚，一定要cool down番。van仔泊在郊外路边，又冇街燈，下着細雨，加上寒風，那時客人又來电追貨，又怕彤彤一個細路女在車上怕黑，三面受敵，我心情尤如「鑊上螞蟻」。我冒着雨濕，打開車頭，希望儘快弄妥啦，舞上舞落，足足整咗十多卄分鍾，先至添加滿凍水，架車先至行得番。


奇怪事來嘞？点解個女，彤彤冇出個一粒聲呢？有乜事呀？上車一睇個囡囡，這一刻，雖過了十年，她的神情，眼光，動作，語調，声線和用語。仍然一一刻在我心坎裡面。她並沒有事，只是靜悄悄地独自坐着，眼仔通紅，留露淚光，佢用帶有英文口音嘅唔咸唔淡廣東話問我：「Daddy, 我係咪乖呀？我冇嘈着你(打擾之意)呀！」其實她一路講就一路想喊，強忍罷了。我當時只有慚愧，內咎，渺小。但另一方面則驕傲，欣惠和感激。悲喜交雜，一湧心頭，雙手緊抱彤彤，將她的小身驅埋藏在心胸內，靜靜用手指抹去她眼边的淚水，沙沙欲哭的聲線，吞吞吐吐地跟彤彤講：「你好乖，Daddy錫哂你呀！」，此時我很歉咎，拿不出勇氣來看她，怕的是，我會在我的彤彤面前哭，表露出身為Daddy軟弱的一面。跟着那半分鈡，兩父女緊抱着默然無聲，心意交通，享受那短短片刻的赤裸親情。我心裡在那一刹那，湧出一個現在已經實現的承諾，就是「我以後不會讓彤彤再受苦哪！」好一句承担諾言就鞭策我不断努力，排除萬難，建立咗自己的小小生意。

回想當晚，不足六歲的彤彤居然能体量我當下心情，獨自坐在黑暗車中，鼓起勇氣，堅持不打擾我。我绝對相信那短短十多分鈡的等待，對她來說是一個可怕經歷，惡夢甚至乎一個酷刑！她也能捱得過去，我為她驕傲！

往後，我生意越來越好，Helen亦於02年冇出來工作，留在家中照顧彤彤。我有時打趣地叫彤彤跟我送貨，她似乎已將那事忘得一乾二淨，得意洋洋的跟我一起去呢。

相中就是四歲半的彤彤

兒時电視片段

小時候，电視係我哋娛樂的主要部份。六十年代，我家已經收看有線收費「丽的呼聲」〔Redeffusion〕。那時只有中文和英文台的它在下午五時開始播放黑白節目，电視首先出現就係一粒小小的多角星，跟着由小变大。然後正式有節目睇。那時我和哥哥和都能一一背出節目表，事關節目不多！

收看丽的，主要原因係爸爸求知慾強，爸爸小時並沒有上學，所以他利用各種途徑來獲取知識。新聞節目及天氣預測就是他的至愛嘞！那時的新聞主播全是女性。有三位係好有名同好美艶有學識嘅，龐碧雲，梁舜燕(現在為無線甘草演員)，另外一位就記唔到嘞。遺忙的那一位，相信三哥可以作答！

媽媽就係典型主婦節目支持者。陳鑑旋醫生的「健康與你」和現在的「曾Sir曾近榮」的〝學以致用〞。

一家人喜愛的節目就有由袁步華，戴偉光和陳有后演出嘅「小夫妻」。外國買入嘅配音節目就一定係講及美國二三十年代，反私酒罪惡嘅聯邦警探，李斯隊長與大惡利法蘭周旋嘅「天羅地網」(即是Untouchables)嘞！

三哥同四哥就最愛睇個套講二次世界大戰嘅「百戰雄師」。韓利中尉，根德沙展，霍比及基智等隊員对抗德軍的事蹟。仲有一套叫「蓬車征西」，講及十九世紀初美國人開拓美洲大陸和紅印弟安人對抗的故事。「柔道小金剛」內裡的缪志豪又值得一提，講佢個仇人師父〝鬼車周助〞如何助他奮鬥成材之事。我仲記得佢果招殺手鐧「排山倒海」係点用出來！到現在，我仲用黎同我兩個細女玩添！甚麽卡通片虎霸王等，我哋三兄弟都係蓆上客，不會放過。

有一套，我一定要睇嘅就係叫「生物奇珍」，所講全係動物昆蟲等等生活動態。可能我就係咁樣培養出对小動物的愛護和好奇。小時的我曾在家中天台飬過鴨和鷄，還有狗，同現在仍有飬嘅熱帶魚。

後來电視漸漸普及化，加上六七年引入免費無線电視，無線以平地一声雷的姿態崛起，在短短一兩年之間奪走香港大部份的觀眾客户，而丽的呼聲就因此很快走下坡啦！

有一件事，我到現在都係十分之「抓頭」，吾知因乜解究，三哥永遠喜愛丽的即現在的「亞視」，而四哥則自無線出現後就「愛無線反丽的」。故七十年代初，家中就出現兩股勢力，就是「丽的純」和「無線純」〔純＝純正無偏〕嘞！真係幾古怪！

最後是講一講丽的在午夜的蔽幕式，播出英國國歌〝God save the Queen〞，播影着伊利沙伯女皇二世登基禮，同菲臘親王向她下跪稱臣的一刻。是不是意味着香港向英政府稱臣一樣呢？

索馬利饑荒聯想

索馬利正嚴重饑荒，但世界上還有許多人大魚大肉地吃。有能力吃好，着好，在資本主義而言，無可厚非。但係，我就十分反對濫用、濫食和濫飲嘅浪費。最乞人憎嘅就係那些所謂「一朝得志」，甚麽「豪得起冇所謂」嘅暴發戶嘞。為咗炫耀自己財富，窮奢極侈，以洗得起同浪費去等人羨慕自己，來取得优越感，真正不知所謂。中國人的优良傳統「發財立品」，「飲水思源」，「粒粒皆辛苦」的道德思想理念係咪比金錢蒙敝晒呢？去咗边度呀？

就算情況不至以上咁差勁，往往西方歐美國家，以及一些發達嘅亞洲城市如香港等等，有些人心中只會諗今日食Ｄ乜好嘢，飲Ｄ乜年份嘅酒等等，想穿腦袋去揾「鳥能」和刁鑽嘢黎食。有Ｄ揾偏門生意人仲驚死冇人知咁，电視直播拍買甚麽屎松露菌王等等，完全冇諗過，有一日會冇得食。捱餓的感覺在佢地身上從未感受過，又点會諗得到別人嘅苦況吖？

香港每日浪費嘅「厨餘」數以百噸計，仲未計埋家庭傾倒在自己垃圾桶果Ｄ喎，我相信大大話話会有成千噸去咗堆填區。罪魁禍首，就係Ｄ乜星酒店同食肆酒楼餐廳嘞，老麥，肯得鷄，自助餐，自助火窩，都係頭号衰人。电視深入採訪發現，過咗某個時間嘅食物，好與唔好，有理冇理咁送晒比大口仔食〔垃圾桶〕。浪費程度令人嘔心同髮指。

如果唔係我哋有咁嘅尖酸刻薄嘅要求，Ｄ生意佬又点会刻意地擦我哋鞋同拍我哋馬屁呢？我哋自重Ｄ，收斂Ｄ，唔好咁招積，慳到番黎，唔好話幫索馬利咁遠嗱，幫吓深水埗，油痳地及大角咀Ｄ流浪漢和露宿者都好吖！父母有話﹕「前人種福後人享」，自己唔好嘥、當留番比自己Ｄ兒女子孫囉。最後都係益番自己友啫！Glen Lo 話「幫人幫己」啦

霸王別姬

你哋千祺唔好以為我傻傻哋呀。我成日有個諗法，就係為我自己选擇十至卄首我最喜愛的歌作為送比自己的「輓歌」。原因係自己至愛的歌曲真係数不勝数。要揀真係十分之頭痛。一生人只可揀一次喎，揀定咗後，播送時只得聽，但冇得反对，冇得後悔！

幾年前送我一個英年早逝嘅學長朋友(其實係大學裡師弟的哥哥)。唔知係咪佢慨歎自己一生大上大落的關係，他的「輓歌」裡就有為他一生作為寫照的由張國榮90年代主演「霸王別姬」內由林憶蓮和李宗盛合唱的插曲「有愛就有痛」嘞。

學長他一生裡光輝歲月，生於富裕顯赫家庭，名門望族，世代從官經商。出身名校。大學畢業即任職四大外資律師行，不到卅歲便成為最年經律師行合夥人，功績可見一斑。90年代活躍政經商界，上流社會，波場常客，他長袖善舞，八面玲瓏，人氣旺盛，見報甚高，很快就打响名堂，與高官富商平起平坐，人財两得。唯可惜在1997金融風暴時一子錯，滿盆皆落索。屈屈不得志的他，独自漂洋他鄉，另謀出路，一時生活啿呵潦倒。期間我亦幫了他少少忙，一為友情，二乃曾為他門下食客是也。

2007年噩耗傳來，我亦由英越洋他國送他最後一程。西式喪礼進行時，就播送「有愛就有痛」這首輓歌了。我腦子裡當時就氾起了一幕幕霸王別姬的場面，臨別秋波，想起學長的他如何「關照」我，我一時感觸良多，双眼通紅，流出淚來。相信他仍有許多心事未了，梗梗於懷。事業壯志未酬，希望東山再起，可惜時不予他。愛情上放不下新相好的妻子，親情上拋不開留在香港的一对十多歲的兒女和年事已高的父母。更令人傷感的是遺下那個不足一歲的小女兒。小女兒在那一刹那，還以為爸爸安睡吧了。

人生苦短，世事如棋，際遇高低起伏難猜。有人謂：「寧做一粒熌爍耀目的石英灯亦不願為微微散光的長壽灯胆」。此語在本文或許有少少啓示吧！

講叻過踢嘅香港足運

啱啱係 Facebook 講咗少少香港足運，Ｄ「攪手話事人」成日話有難度，好很辛苦都攪唔起足運，香港球會仲有越黎越踢得差咁話喎！

足球運動普及化只不過七八十年嘅歷史。二次大戰前，好多人都唔知足球係点踢点玩。二次大戰後，經濟起飛，政治穩定，人民富裕起來後，講句肉酸Ｄ，先至「飽暖思淫慾」，去揾Ｄ既刺激又有觀賞性嘅体育運动黎玩吓。足球多人玩，速度快，節奏緊，變化多，快上快落。技術可觀賞度高，緊張時刻此起比落，防守進攻無時無刻，戰況电光火石間改變，加上領隊戰術攻畧和球員個人素質高低等等令一場精彩足球賽事成為一套有好演員好導演好劇本好埸景和好觀眾嘅电影。正因為足球運動係團隊性同集体玩嘅運動，加上要球会制和集合力量先至可以攪起場波，理所當然足球就令人結集一起來玩同睇嘞！久而久之就变成地區性，演变為各球會互相競爭，跟著就地區，發展至城市嘅競爭，甚至乎國家與國家競爭，要做世界1哥咁嘞！

我係曼聯躉，初初同自己友(英籍朋友)講波經時，曼聯躉往往用We(我哋)同曼聯溶為一体一家一個世界，我起初都唔慣，但久而久之都習慣咗，並覺得咁係啱嘅，同會更投入Ｄ。有人話，曼聯係英超一哥，以「自己」同「我哋」相稱，梗係「摱衫边」同「攞個彩」啦！但係在英國，許多乙同丙組小球會嘅fans都係用「我哋」黎稱呼(address)自己球會嘅！絕对同戰績獎牌拉不上關係，完全係自己祖籍，同愛護擁帶嘅原因是也！依種「死硬die hard」忠貞精神真係籍得鼓掌！

自己球會贏波或升班一定大事庆祝，各行谷業，上上下下，大大小小，政府商業等等機構都會參與上街遊行庆祝。相反如果輸波降班就悲傷心痛，甚至痛哭流涕。此情此景於季末當天就可見一斑！电視鏡頭就一定絕不放過依Ｄ落淚痛哭的場面。

講咗咁多就係想講一句「融入」是也！有人講過擁護自己球會係一生一世。絕不會是牆頭草，或隨風擺柳嘅心態。或多或少，香港人睇波都係睇明星和戰績。边隊當打边個球員當紅就擁边隊。甚至乎边個「好樣有型」或多花边新聞就擁佢，咁自然哋擁埋隊波嘞！無可厚非嘅，現今足球已經被攪成show business娛樂事業，我個人都 thunbs up 贊成。無商業原素，無錢無着数在裡面，今時今日，攪乜叉嘢都攪唔成啦。我对此並不贊成，但是講出現實啫。

既然要用錢去燒先至攪旺壇「火」，咁對洗錢至叻嘅香港就「依絲」job嘞。楊先生用咗唔知幾多億先至買到隊新鮮熱辣降班嘅「伯明罕」，不如留番黎在香港攪隊超晒班嘅波仲好啦！長遠計一定有着數。首先用英超西甲嘅半棄明星帶着本地新人加埋一個有Ｄ名嘅教練去打，當隊超班波在香港「趙低」哂其他友仔，再北上「揚刀立萬」，見人劈人，見鬼斬鬼後，做咗中国「阿一」，跟着踏出中國，打殘埋甚麽南北韓、日本仔、星馬泰、再揪低沙特伊朗中東國家等等。加上無線，壹，東周刊大力宣傳，电視台刻意用多十座八座攝影機捕捉球員作赛鏡頭，加埋剪接修揖後，每場波一定比你成龍同甄子丹Ｄ动作片不遑多讓。將Ｄ球員再攪到明星效应，民族英雄偶像咁，一定大乜把fans啦。一下唔覺意揾到個香港碧咸，淨係收贊助費都收到手軟。有人氣就跟着有財氣，往後就有老細泵水投資啦。而家馬會都玩緊賭波咯，理应大力吹谷同「幫拖」自己友嘅。

仲有就係，而家香港地舖閒閒哋一億幾仟萬，Ｄ業主錢多到跌咗都唔知。球会地区化就勢在必行嘞。如甚麽大埔和富，香港仔，屯門，沙田，繼而去旺角，灣仔，銅鑼灣，中環北角等等，揾班叠水地主撐吓，再向地舖商戶埋手攞赞助，一萬幾仟绝对唔係問題，怕就係班有水之人話你唔去揾佢咋！話你唔比面佢先至最驚。look down on 佢地啫！道理很簡單，face 問題是也！其次就係，好似「曼聯」幫曼徹斯特城在冚個地球打到個名响噹噹。二十多年前边叉個識「曼城」吖？有人仲以為曼徹斯特市係英國首都添，倫敦第二咋？？你唔好話唔信呀，個地方有名，有勢有人知，Ｄ地價都貴Ｄ。名人効应吖嗎。香港人就最「啱聽」呀嘞！

加上埋最後依個大元素，中國人最愛賭，点解Ｄ錢比老外賺呀？如果自己足球攪到「有料升呢」。Ｄ錢就「拿拿林」回塘歸边啦。仲边駛比外人「掠」走晒吖？相信有朝一日全中國嘅超級聯賽一定最多人睇，最多人擁同最多人賭。

爸爸為鑑

回首一望，做啤酒依行已經大大話話足十年嘞。雖然唔係乜嘢大茶飯，但始終係自己一手一腳揍大嘅生意。由01年至今，都經歷過風風雨雨，08年金融海嘯 economic down turn and turnmoil，我都好有運氣屹立不倒。眼見其他大大小小酒行結業倒閉，我都尚算站穩住腳。這可能跟我保守作風有關。以往十年只有人欠我貨款，沒有我欠人的。更加冇同銀行貸款，所以能避過依一劫数。


有人話我作風太古板，不懂利用槓桿原理，应同銀行借錢融資，發大黎做，買車買廠、增聘人手，加添生材器具，增加存貨，發展客源。咁就事半功倍嘞！我唔敢去做，鵪春心態是也！但有一樣百分百鉄一般嘅事實，就係我仲生存係到！啱定錯就見人見智嘞，係咪阿Q精神呢？我真係唔識答你。


如果有睇我facebook嘅朋友，相信都知我開咗間小型超市。主要經營酒水和東方食品。依次攪作，都可以話十年一遇。十年前兩手空空，幾大都要搏一搏啦。但今日就被人形容為「捉虫」或「阿茂整餅，冇個樣整個樣」嘞。


可能係年紀大咗，精神魄力都不復往之關係。做甚麽都比以前勞心勞力。十年前就無得選擇，破斧沈舟咁去做。今天就常常問番自己「駛唔駛咁」呀？我對自己嘅決定，每當逆境時都會有少少動移，但回想一下，十年以來，大小困難都一一跨過，現在只是芝麻綠豆，鷄毛蒜皮嘅瑣碎事就困擾不堪。是否先前幾年食惯玩惯，現在無病呻吟呢？洋人有謂「make a big fuss out of nowhere」講法一樣？

講開又講吓我個偶像爸爸嗱！他冇讀過書，事業全盛時，名下有三間公司，上下僱用五十五人之多。我而家依個「細鷄嘢」生意又点同當時經濟困難時期的爸爸比呢？我每當有困難逆境時，都会想番爸爸如何自勉奮鬥，創做理想為借鑑。

父親節

爸爸從小都無受教育，識字不多。但对知識追求就十分熱切。

六十年代，丽的呼声有線电視開台不久，我家雖不富有，但也成為电視用戶了。當時能擁有电視在家殊不簡單，可以用「奢侈」來形容。爸爸目的就旨在為他子女增廣見聞和自己得知世界香港新聞大小事件。不讓自己和家人坐井觀天。未有电視之前，不識字的爸爸都有買「快報」習慣。放工回家就叫子女唸讀給他聽。籍此得悉身边之事。

随了不断自我增值外，爸爸很希望子女不步自己後塵，能得到教育成長。对每一個子女都講以下一番說話：「你們要努力讀書，多少錢爸爸都盡力給你們。」我們六兄弟姊妹，自少已上當時有着傳統中國教育思想的麗澤私立中學。爸爸自掏腰包付學費。有些守舊親朋不明爸媽苦心，就打笑說着「不用讓女兒讀書呀，將來有夫家養呀！」。老實講六十年代中學畢業比現在大學畢業更難。

大姐完成中學後，二家姐畢業英文商科，七十年代三哥留美大學，四哥畢業台灣後升讀英國，八十年代我則畢業英國，小妹妹亦留英進修。

父母对我們六兄弟姊妹之裁培養育，他倆從未希望有甚麽回報，只望我們自立長進。相信爸媽的希望已如願以償。对許多富人來說，這只不過是一個「理所當然」或「舉手之勞」。但我爸媽就為子女付出他們人生的一大部了。

我可惜的是「子欲養時父不在」。奉喻还有父母親健在的子女，及時行动吧！

阿人同佢三個老友

冇幾耐之前，有條友仔叫阿「人」。佢成世淨係想追到佢嘅夢想情侶阿「銀」。阿人日諗夜諗点先可以追到呢？於是乎走去揾佢個班老死幫吓佢嘞！

第一個阿人嘅老死叫「時光」。阿光拍哂心口同阿人講：「喂阿人，你唔駛慌呀！我撑硬你架，只要我有一日，你就有一日，100%撑硬你嘅。」於是阿人就好放心咁去揾其他Ｄ老友幫手。

第二個老友叫「健康」。阿康同阿人話：「我就唔係好似阿光咁，你有幾多佢就比你幾多架，今日幫到你，明天或者唔得，不過我咁後生，幫得幾多就幾多啦，你要睇着吓我架！知冇？」阿人就係咁又多個老友撑佢嘞。

第三個老友叫「情義」。阿義話：「阿人，我就一定幫你嘅，但幫咗你之後，千祈唔好唔記得我呀？要互相照應！」阿人保證話，我有情有義嘅，你唔駛担心呀！

得到三個忠肝義胆嘅老友祝福，保證和死心塌地嘅幫助，阿人於是乎滴起心肝，日以繼夜，耗盡精力，不摘手段去追求阿銀嘞。唔知道係边一日，阿人終於胡理胡塗地追到阿銀。依個阿銀就真係「陀衰家」。阿人得到手後，想走去向昔日班「拍心口，照着佢」嘅三位老友炫燿一吓啦。見到阿義，阿義好慶咁話：「你淨係識利用我出賣我，只有你着數，乜都冇我份。」
同阿人冇乜計倾吖，一走就走咗去，淨番阿人一個孤零零。阿人走去見吓康仔啦，康仔就慘咯！又老又殘，企起身都冇乜力，講嘢時都咳吓咳吓。同阿人講，幫到你今日，明天都冇法子嗱！你自己好自為之。跟着訓番落床，講多句都冇力！

阿人有Ｄ唔安樂，不過仲有一個光仔吖。見到光仔，光仔同佢講：「阿人依度有張車票，係你同我一齊坐嘅尾班車，要走啦。」阿人話：「我啱啱光至追到阿銀咋，我唔想走咁快！」光仔提醒佢話：「當日同你講咗啦，我有幾多就同你一樣有幾多。而家我冇晒要走嗱，亦即係你要走，冇得揀。當年我咪係訓晒身倍你去追阿銀囉！係你嘥哂唔真惜啫！」

阿人好後悔，追到阿銀都冇得享，想改變主意唔要阿銀啦！但係義仔再唔信佢，阿康長睡冇力聽佢講，最慘係阿光冇得比阿人揀，一于拉着阿人上尾班車，快快脆脆同阿銀講Bye Bye。

剩低嘅阿銀，佢一Ｄ都冇可憐阿人，佢話依個「人」要唔到我啫，仲有千千萬萬其他人趕著黎要我！

骨灰龕

討論以下課題前，有必要自我表態先。我不是一個迷信的人，但若問我〝人死後會係点？〞一定要比答案，唔得話唔知，咁嘅情形下，我会選擇人會再投胎，好似一個永垂不朽的energy咁延綿不絕下去。

言歸正傳。近幾年，香港為咗個骨灰龕問題，攪到頭都大埋。中國人傳統思想係，家人去世後，最好揾過咩咩福地，背山面海，座北向南，冬暖夏涼，安葬遺体，入土為安係首選，要安放好個先人，等佢舒服泰然，開心瞓得覺落，咁樣先至福澤後世喎！如果後人冇咁嘅財力本事，事關香港地貴過金，就「趣趣地」火葬慳番嗰二，三十平方呎但郁吓要一百幾十萬嘅墓地啦！跟着去揾個骨灰龕場擺好個龕，放得企企理理，乾乾乾淨。一心旨望已故家人降福照顧嘞。尊敬先人，冇乜唔啱，但係有咁機心就好似出發点錯咗囉，駛唔駛咁表面化，跟英語所謂嘅 「instrumental 」同出一辙？

依一樣風水命理嘅嘢，係咪迷信見人見智。但係我總覺得同以前社會比較，好似有過之而無不及之勢。原因又係一個字「錢」作怪。

以前人揾錢，大多数靠勞力，跟着係腦力同努力，以後就係實力。八十年代尾後，當金融業地產界以超晒速發展後，就出現咗一新勢力「食力」是也。食埋人個份，食咗人塊地，食着人上位，食大佣，食大茶飯，食着個勢，食盡天下等等。跟以往嘅「勞」，「腦」，「努」和「實」力都唔同。個Ｄ上位大茶飯暴發户，自己撫心自問，何得何能，今日一切所得極可能都靠「食」力而得。於是乎諗吓諗吓，係咪自己有神靈庇護，從而相信連自己都解釋唔到嘅幸運同迷信之上。心底下，佢若多若小都知架嗱，但係唔肯有勇氣企出來，承認妥協自己確實做咗Ｄ乜嘢啫！

既然有咗錢囉，咪攪場「大龍鳳」拆掂佢囉，等一來，自己心安理得，二來，一個「乾坤大挪移」，將他人「点睇佢」卸咗去風水命理，話自己條命生得好，对先人孝義俱備，祖先庇佑，所以有福蔭嗱。

加上骨灰龕乃大集團經營銷售，講緊係數以億計嘅生意，當然有市務宣傳部攪推銷啦！咁咪乾柴烈火，如虎添翼，「姣婆遇上脂粉客」，一買一賣，咪水到渠成啦！

去買骨灰龕，係有「閒錢」人嘅玩意，唔係边個边個，阿甲阿丙都可以舉手話玩就玩架！冇「閒錢」嘅，就不妨睇以下我嘅諗法。

我都唔知点解先人〔如爸爸媽媽〕骨灰一定要放在龕場嘅道理，係咪marketing諗比我哋消费者嘅歪理呢？点解我咁諗，好簡單，先人乃自己家中最親近嘅人，如真係有「在天之靈」，只會係你家中保護庇佑你就真。点解要佢地孤零零係龕場同Ｄ三唔識七嘅「靈」一齊住呢？尤其我阿爸，佢都好要乾淨企理架，会唔会唔惯呢？最好就係跟番自己仔女嗱。对我黎講，绝对無問题，perfectly fine.

現在欧美流行一种處理骨灰妙法，就係將骨灰種落Ｄ「襟生」嘅花草樹木，草木茂盛長大，就尤如先人在你左右，对你家帶來「生氣新機」。大家可以考慮考慮！

威廉王子大婚

今日2011年4月29日，係英皇第二繼承人威廉王子與民女凱特嘅世紀大婚礼。

英國特別放假一天，等國民上下一心去庆祝依件舉世足目盛事。据坊間非正式詁計，今次約有二十多億人，親身或透過电视都会「八」一吓依個婚禮。英國皇室，繼81年威廉個老豆查理斯同阿媽已故戴安娜皇妃的盛大婚礼後，都冇乜攪過大派对啦！今次30年後，英國佬話「有就唔志在，冇又唔差在」嘅心態，攪番Ｄ嘢去沖喜一下英國國運啦！相信今次會帶比英國有200多億英鎊嘅海內外收益！

有樣嘢就真係要「棟高隻大姆指(thumbs up)」讚吓英國佬嘞！全世界嘅皇室体系裡，英國仍然最大，最完整同最受歡迎愛戴。攪親喜事，其他欧洲皇族如丹麥，西班牙，希臘等等都十分撑佢嘅！今次婚礼，泰國、日本、沙特同汶萊皇室都黎祝賀。正式「振臂一呼，萬夫皆應」！仲攪得有聲有色，極具视聽娛樂之效！

自二次大戰後，英國國勢家道中落，跟十九世紀末，二十世紀初截然不同。國人对國家越來越不滿，原因係英國勢力再不如往，甚至乎被人牽著鼻子走。好在有個皇室仲係現今依個「買少見少」嘅皇族世界裡，仍然手執牛耳，話得吓事，英國國民仍自豪驕傲！

今次婚禮，為英國人黎個「大沖喜」，無妨係件好事。至少我哋嘅二三十户人家嘅小小社區都團結起來，攪個大street party，無分種族，大小老幼，一齊慶祝吖！



環保小貼士

如果我哋係日常生活中，做任何事之前，用吓個腦去諗吓点可以節省資源，都可以為個地球同你個荷包慳番好多架。以下就係「我師奶仔眼中」嘅小貼士，不妨大家研究一下。

1. 將塊紙巾一分為二用，可以慳番50%，事實上唔需要用咁大塊嘅。

2. 擦牙時唔好開着個水嚨喉，任由Ｄ水流走。須知道世上有好多人冇乾淨水飲用呀！過濾清水要用好多Energy架！

3. 煑飯餸適量就好，煑多咗就第日食。保存得妥就冇問題。

4. 間屋窗門有罅隙，門窗漏風就封咗去，咁冷氣暖氣就可以保存屋內，室温差三幾度架，电費都慳唔少。冬暖夏涼。

5. 唔好開着個电視就走咗去。做緊嘢時又想有娛樂，可以考慮聽收音機，慳电好多！

6. 去附近地方就预多少少時間，行路可以當坐車，健康又環保。好似由中港城去到天星碼頭咁，成條廣東道都係商場，一間穿一間，又有冷氣，好行之外又有嘢睇。

7. 梘粉同清潔劑講嘅份量唔須要跟足。好多時都係Ｄ奸商想你班消費者用得快Ｄ咁解啫！ 

8. 煲水煲夠用就得嘞。大煲熱水滾咗後又「炭」番凍，又再煲番熱，貴時失事，水質又唔好呢！

9. 唔好去食咁多Buffet嘞，如果你見到Ｄ人食剩嘅厨餘，你一定話「折墮」！

10.煑嘢用合size嘅煲煲罉罉。唔好用大煲水烚隻疍或煑個麪。大煲要用好多energy 去heat up 架！

不過我都要身体力行先，就係決心換咗架3200cc嘅四驅車先啦！

悼念廖正昌先生

廖正昌先生乃英國利物浦中華行超級市場創辦人。二十世紀六十年代創業，經營利物浦和黑池區唐人雜貨糧油凍肉海產生意。員工超過一百，年生意額達二千多萬英鎊〔約三億港元〕。於英國西北区享有盛名。


廖先生不幸卒於2011年4月10日。終年七十八歲。廖先生生於一九三三年，無乜受教育，自少遠渡重洋往英國打工，卄多歲在利物浦當上印刷技工，後轉投發展超市，憑着刻苦耐勞毅力，努力不懈精神，由一人公司發展至今，成為華人社區數一數二大企業。廖伯亦樂善好施，捐錢出力，為利物浦华人謀福祉。受人敬仰愛戴。


廖伯生前已退居幕後，生意由他的大仔廖仲敏James打理。


2001年，十年前我偶爾遇上我今日生意的好拍擋James，後大家生意發展迅速，間接下認識廖伯。我第一次見廖伯時，我是在舊中华行，只見他執拾一般瑣事，完全不像一個老板。後來James介紹，我才認識他。那天很忙，James幫我搬貨上貨車，我等都做得辛苦，上完貨後，我跟James閒談聊天，只見廖伯親自端上熱茶和餅乾給James，还拿著紙巾給他兒子抹汗。流露出無比父对子的關懷愛護。那時我父親去世三年，我個心立刻想念我爸爸昔日的樣子。心中酸溜溜不好受。对此刻的James既是羨慕又是妒忌！


James十七歲時已幫助廖伯經營超市生意。三十多年前，上落貨都要用人手做，拆櫃裝櫃亦如是十分体力勞动工作。James 事無大少都親力親為，為中華行付出甚大。James 為人正直務實，樂於助人。常常說是廖伯教導做人宗旨。寧願「被人揾笨」都唔想去「揾別人笨」。忠於這個宗旨，中华行四十年迄立不倒，是有道理。


廖伯不懂英語，發展他鄉生意時，所受到障礙困難，定必比我們現在遇到的數以倍算。廖伯能排除萬難，建立兩代事業，實非等閒。


我見廖伯不多，但他每次見到我就跟我詳談，常常跟我「細說當年」怎樣建立中华行和他做生意要「老實忠旨」。廖伯熱愛家庭子女，他跟我講James幫了他很多很多，有時覺得「捱壞咗」James，語帶悔意，洋溢出無比父愛。中國人，父对子女的愛很含蓄，都收藏起來，不愛表達。廖伯這樣直言不讳，道出他对子女的關懷呵護。

大女彤彤〔一〕

大女曉彤生於九六年一月卅日子時，在港島聖嘉勒刹醫院出世。重不足六磅。但生产過程順利，當時我亦在产房，目賭佢出世那一刻。初為人父，相當感動，開心之際，不其然流下淚來！零晨三時我坐的士回海怡半島家中，的士正播送「Style Council」 的「You are the best thing」，此曲正切合我心情哦！


翌日，爸媽一早到訪。爸爸也特別為Helen送上薑蓉鲜疍炒飯，極之關懷備至。彤彤也是爸爸在生時最細的內孫。


九六年時，香港回歸在即，很多事都同祖國拉上關係。「曉彤」依個名就十分之中國化，亦十分之有意思。「曉」是早上太陽初升，「彤」是赤紅。意謂赤紅的初升太陽。


彤彤個子不肥不瘦，疍圓口臉，加上一雙大眼睛，很討人喜欢。她未到一歲就可以站起走路了。學嘢好快，亦好貪玩。有好多事都要自己親手做。兩歲左右就自己坐在浴缸洗澡了，不許他人幫。她喜愛跟我到九龙公園游水，那時有個救生員就最開心見到佢黎，因為好少有咁細個妹仔唔怕水嘅！彤彤好动得很，七，八個月就從床仔爬出黎，個頭先跌落地，呱呱大哭。初為人父，冇乜經驗，就「拿拿聲」帶佢去医院，好彩医生話冇乜事，唔使照X光啫。兩歲時又扭到隻手，又要帶佢去睇跌打医生。


彤彤不到三歲就跟我移民英国，往後嘅二，三年日子都過得不好，做爸媽的都有点難過。

初初到英国時，我租下一間外賣店，兩夫妻請多個伙記合力經營。三，四歲嘅彤彤每逢週末或放假都要返舖跟着我們一起，過著一些係細路仔都唔鍾意嘅枯燥苦悶生活，如是者都過咗年多兩年。一次我帶她到友人家裡代為托兒，深夜才去接她返家，料也不到，她整夜冇睡等着爸媽，開門接她那一刻，我仍然記得她開口第一句話係：「Daddy, 你係咪唔要我啦？」。此刻心如刀割，以後都再冇揾人托兒過夜了。直到02年，我開始做啤酒生意，生意漸有起息，加上Helen有了汶汶，在家候產。彤彤才可以留在家中，才有番Ｄ正常細路女嘅生活。彤彤这個童年，也許她不太記得清楚或冇乜深刻印象，但对我來講，依個經歷就是我心中的一個慚愧烙印。

幼年彤彤很活潑，在小學裡很受欢迎。每逢同學仔生日会都請埋佢。班中有個叫Lucy 同Sophie嘅英國妹妹就為咗爭彤彤做佢嘅 bestest friend就成日吵架嘞！

07年，彤彤上中學。09年我們搬家到學校附近。以後彤彤就自己走路上學去，不用我們粗心。小妮子功課一向都是中上，唯數學比較差，英文科就特別好，四歲時已經自己寫故事，那本處女作Swan Princess & the Witch我仲保存係到 。上到中學後，數學有明顯進步。她語言能力極高，经常比German teacher話佢叻！運動就係佢強項，係羽毛球和網球校隊成員。代表出赛全國中學校際比賽。雖然冇得到咩嘢獎牌，但其志可嘉。唯独她不太愛在班中表現自己，先生每次在parents evening 都叫我鼓勵她在課堂時多参與。

十五歲的彤彤已婷婷玉立，前年已有男朋友。我对她有信心不會乱來。而事實上佢亦很主动徵求我嘅意見和允許。彤彤強調絕對係冇「男女關係」嗰種，我亦十分相信她。老實講，我都見過那個男仔阿Ben，他也到我家短住幾次。Ben為人十分純品怕羞。想他被彤彤掌握控制之中。

最近彤彤跟我談及上大學嘅事，佢話最好就入到 Manchester University 修讀 Microbiology。都好嘅，立定志先，等自己有個方向。彤彤經常講，她一定要完成大學，找到工作，安定下來，才談婚論嫁。

在我心中，我係欠彤彤一個快樂童年。可能佢已經忘記得一乾二淨，我做佢父親，立志話過以後一定唔會比佢再捱苦。I love you Hilary!

相1:彤彤十歲。
相2:彤彤十五歲，汶汶七歲半。

幼女嵐嵐

幼女曉嵐 Ellie，於04年十二月十九日早上於Macclesfield 出世。約六磅重。她只不過比二女汶汶細十八個月。

嵐嵐來得突然，唔係計劃之內。生咗汶汶後，同Helen都未決定再追唔追多一個baby，猶豫不決時，嵐嵐，佢就叫爸爸媽媽 唔好諗咁多，擅作自張，自己執埋行李，跳上尾班車，到我家做最小的啦！

嵐嵐個子不高大，比起「肥妹」汶汶差了一截。加上她對「食」不感興趣，每每要追着黎餵佢食飯。佢對於零食小口就特別偏好，Helen有時要收起Ｄ糖果餅食先可以阻止依個小靈精揾得到！勞氣之極！

剛剛講過嵐嵐出世係佢自己揸主意嘅，現實生活裡，佢又真係幾獨立和有主見。汶汶就比較女仔同嬌滴，但係嵐嵐就活躍和好动。雖然比汶汶小歲半，公園玩和運動上都唔會比汶汶差！三歲學會游水，四歲已識踏二輪單車了。玩依個体操更見身手敏捷，平衡功夫了得，從後睇佢仲以為佢係男仔添！

嵐嵐個性都十分故執，四歲番幼兒班時，同個先生就「攪對抗玩罷食」嘞。事原嵐嵐自小吃慣媽咪煑嘅中式料理，一番學，就要食Ｄ幼雅園嘅營養歺，當然一百個唔願意。於是一Ｄ都唔食，一路喊，喊到Ｄ先生攪佢唔掂，要打电話黎叫我哋接佢走！往後Helen愛女心切，都專為嵐嵐做佢嘅特別午餐！久而久之，好彩嵐嵐都可以接受西方主流生活，而家都可以食西餐了。

Helen 成日都話嵐嵐似男仔多個女仔。嵐嵐麻麻地鍾意穿裙子，牛仔褲就係佢嘅至愛。

嵐嵐的「到來」就好似上天特別賜多我一個宝貝女咁，我亦從來對佢冇抗拒，樂於接受！

妖言惑眾

早一兩年前，香港科學園被審計處踢爆，話用咗成百萬為科學園睇風水。笑話之大，可見一斑。政府部門，涉及偏門如警務處等有此一舉，情有可原。但打正牌頭，以科學論證為依歸之科學園機構，竟然要睇風水，就難免講不通嘞。
「睇風水」依一樣嘢，係咪迷信？見人見智。但係我総覺得同以前社会比較，好似有更加多人信添，唔知係咪拜「傳媒电子化」所賜呢？

英國無線衛星台最近有幾個節目都同神怪迷信話題扯上關係。仲係常規節目，每星期都有得睇添。第一係套係每晚在八時半黄金時段播放嘅「每日通勝」。蘇民峰依條「木咀」講埋Ｄ嘢完全不合時宜，甚麽吉時，害時，財位，破財位，吉星災星，宜做及不宜做等等。跟現今步伐快節社會節奏完全脫軌，边仲有人同你講依Ｄ嘢吖，就算有都係絕少數人。最好笑就係講埋Ｄ甚麼「不宜作灶，安牀，做船，作車」等等上個世紀都冇乜人做嘅嘢添！講嗰個蘇民峰謊唐怪誕，狗屁不通，令人咋舌嘔心，唔經大腦，依書直說，侮辱觀眾智慧。比套嘢出街個監制更加白痴，胡理胡塗，要拉去餵狗屎。我打趣話，中國人最重視個「吉時害時」嘅「宜與不宜行房」，依個呃飯食嘅蘇木咀，就一句都冇提過？佢係未弱過藥煲呢？

第二個係「香港有運行」，同風水命理有關。主持李丞責正一「山草藥」up得就up，話香港扯旗山頂，港島南同半山區有龍氣，住係嗰度Ｄ人会旺財，有權、有勢、有運行等癈話，同隨褲放屁係異曲同工。咪即係話：「阿媽係女人，李嘉誠好有水」。依Ｄ百多年前英殖民地政府留下來嘅鉄一般事實，一出世嘅香港人都知啦！再者，講風水，講乜鬼嘢吖！！係人都知，「香港有塊地，幾世都唔憂」嘅道理。回想三，四十年前幾多新界原居民咪要漂渡重洋，到歐洲英國做餐館、飲食之類嘅勞力工作以解生活。点不知十多二十年後，一個唔覺意，新界話發展，政府話收地，轉眼間個個都家財萬貫，小嘅二，三千萬身家，多則過億。依Ｄ咪，唔係乜鬼龍唔龍氣囉！只不過係咪輪到你啫！

第三個叫乜嘢「民峰學院」，跟本就係莫過於導人迷信技倆。綜觀現今Ｄ後生仔女，立壞心腸，好高騖遠。甘心放棄主流工作和務實事业態度，投身於玄學風水掌相命理等行業。目的旨在揾「快錢」、貪「易錢」同埋賺「大錢」。依Ｄ咪多得依個世紀「貪王之王光棍風水師」陳X聰所賜囉！加埋無良傳媒刻意作大吹噓囉！

第四個叫做「詭異檔案」。就係嗰個幫已故华懋小甜甜睇風水嘅司徒法正做主持。節目持探討態度，亦具趣味，不乏娛樂之効，但亦助長迷信之風，應該多用科學角度去引證，糾正誤會。

無線貴為香港和亞洲大电视台，應有教育社會責任，不應為求收視就硬生生胡亂狂餵一Ｄ對我地下一代百害而無一利嘅飼料啦！我覺得我地下一代嘅主觀認知態度已很簿弱，加埋傳媒咁有理冇理比我地硬「梗」！我地下一代就更啿呵啦！謹奉獻無線高層一句「制作多自重」。

伯爵酒樓

如果有人問我有乜嘢事同我爸爸一生裡有淵源，我想伯爵酒樓一定位列三甲。


昔日伯爵酒樓，位於佐敦道與上海街之角位大單边，敦成大厦地下，二、三及四樓。它離我家只不過是轉過一個街口，從我家後窗看出去就可以看到它的厨房。酒樓入口係在地下左面走上去，有升降机接載茶客到三，四樓。二樓客，就對唔著，請行樓梯嘞！右手面就係伯爵餅家，做中式礼餅，尤如今日大榮華餅家之類。二樓，三樓早上六時開市而四樓就七時正。二，三樓係平民化，枱面冇枱布，剩係用一塊大玻璃，方便清理同慳番洗枱布錢，仲有痰罐個隻。四樓就比較高級，除咗有枱布外，地上有地氈，最重要係冇痰罐，Ｄ食物貴Ｄ和二，三樓係食唔到嘅！


伯爵，我記憶中，若莫係六九或七零年冬天開業。点解呢？因為爸爸同我哋係佢開張第一日早上七時剛過，天啱啱光，就上去光顧嘞。若然爸爸唔係伯爵第一個客都應該係頭五名。當日應該係假期，我哋兄弟妹唔駛返學，一行幾人，爸爸抱着小妹妹，我跟着一齊去。三哥就買埋份快報先至上、四哥都可能一齊去，但大家姐，二家姐係假日一定唔會早起。而媽媽一定做完家務先至黎。


去到入口，我最印象深刻就係見到個部長〔祥叔〕用吊筆書法係掛在牆上個紅色「嘉賓題名」牌處用白漆毛筆書上「歡迎光臨」四個大字。因為第一日開业，晚上冇賓客預定酒席是也！


昔日伯爵都算佐敦道高級酒樓。將道上傳統老式嘅地踎「雲天」，「龍如」等酒樓比了下來，有得同佢爭一日長短就係位於白加士街口近彌敦道嘅「鴻運」嘞。食物方面我最喜愛就係個籠「鮮蝦餃」。事實上，好多人都話佢「正」。第一皮薄，晶瑩通透、第二，蝦大而鮮，第三，餃內灌有高湯，餃中濕潤易入口，有多食不厭之感，閒閒地可以食一兩籠。西菜牛肉，燒賣，鮮蝦粉菓，豉椒鳳爪，排骨飯，糯米雞，荷葉飯，腸粉，春卷，咸水角，竽角等等都十分好食。六、七十年代有依Ｄ嘢食已經很豐足，絕對不能同今時今日之標準同日而語。記得一次，我同妹妹，四哥一起吃了三、四籠鮮蝦粉菓，爸爸亦很放縱我們「任食」，等到媽媽黎到發覺，一見就「駡」爸爸縱鬼壞我哋。仲有一道食物籍得一提嘅係嗰有創意嘅
「太極鴛鴦炒飯」，疍炒飯在底，上面蓋上雙色「太極」符。太極符一边係茄汁鷄絲，另外一边就用白汁蟹肉。個太極符做形別緻精巧，極盡「色香味」俱全之效。現在許多食府都用白汁蝦仁取締蟹肉啦，成本高昂之故！


講番爸爸点解可以情牽伯爵二十多年呢？皆因伯爵有班人情味濃嘅好伙計！首先介紹係四樓部長「祥叔」，原名吳錦祥，個子不高，臉上長有「二別鷄」，笑容可掬，態度誠懇，談吐温文有禮。予人親切感覺。另外一個樓面叫「奇叔」，花名「生鬼奇」，為人風趣幽默，見識廣博，最鍾意同爸爸談天說地。其他伙記有大榮、細榮、陳本、高佬信等等都係以伯爵為家，一做就係十年八載嗰隻！祥叔係開国功臣亦是末代遺孤！


爸爸每天七，八点都到伯爵，班伙記見到我爸爸就好似見到自己老板咁，一定留張大枱比佢坐，如果太忙冇留的話就幾「帶」都死掂一張比我爸爸。事關知道會越坐越多人最終坐滿。由此可見我爸爸人緣甚好同極受歡迎。我父不拘小節，貼士一定有多冇少！点心妹一定推点心過來推銷，爸爸絕冇托手踭，食唔食都會係咁意叫Ｄ。又若然厨房煑錯餐冇人要，班伙計就一定諗到攞過離比我爸爸，爸爸抱着幫得就幫嘅態度、照單全收〔其實我爸爸本着唔好晒嘅精神都會最後食晒〕。


伯爵四樓就係我爸爸的「行政辦公室」。所有親朋戚友，生意伙伴都知爸爸每天都係伯爵，所以唔駛約，自动「浦頭」就得架嘞！早上七，八時起至十時都会係四樓找到我爸爸。好多時中午飯，晚飯鵲局亦係伯爵。有乜生日喜庆亦係伯爵。


伯爵比到爸爸一份親切、融洽和尊重，爸爸就係咁「上伯爵」成為生活的一部份。一上就係二十多年。打風落雨都無阻爸爸一到的興趣。引象中，某年十号風球，風球一落，爸爸就忍不着走上去飲茶。
伯爵於九十年代初結業。結業前夕，爸爸亦特別訂下酒席賀它「榮休」。媽媽就話，厨房一定比Ｄ「食剩尾」我地食。對爸爸來講，當晚食乜嘢絕對唔重要，最重要係爸爸能見埋「他的伯爵」最後一日，臨別秋波，依依不捨。從此伯爵係爸爸心中劃上句号。


爸爸對人對事都用情專一，有情有義。我則花足幾十年才体會得到！


後記 二仟年後，在佐敦遇上奇叔，互相問好。奇叔問到爸爸，惜爸爸在九九年辭世。奇叔臉上汒然，無限唏噓。


相片 爸媽合照。相信拍於七十年代尾，爸爸或媽媽生日宴會。

中國人跟西方人的「抓銀」理念

我間豆腐仔咁細嘅飲品公司除咗係英國曼城利物浦區域代理中國青島啤、星加坡老虎啤、泰國星啤和象啤外。好多其他啤酒如百威(Budweiser)、德國鎖匙(Becks)、可樂、百事汽水和果汁都係同大代理拆番黎再分銷嘅。咁嘅情形下，個一分一毫嘅差价都會影响個盈利。

今日歐洲經濟不景，「阿茂」都知道有幾衰。制造商冇「水」生產，做多咗又驚冇人買。分銷商好似我地咁亦係一樣，客人遲找數就冇錢買貨、買得多又怕庄死晒Ｄ錢，直情係進退兩難。

不過，話分两頭，正所謂有危就有機。好似聖誕時期，貨多咗要速銷時，我地就執咗批筍嘢嘞，比原价足足平咗30%！都叫過番個「肥年」。

上個星期就有同一樣「jack so」發生。我於是連三個女嘅「豬仔錢箱」Ｄ錢都抓埋出嚟去買可口可樂汽水糖交，因為又係平成一大截。

個間英資大代理同我都幾熟架嘞，我入到貨架，見貨就掃啦。攞到冇現金找數為止。因為係超低价，代理話明総公司唔比賒數，冇信用咭，只收現水。好嘞，去找數，單都打埋，數緊現金之際，唔知边到彈個「騎離怪」supervisor 出黎。佢話唔可以賣哂咁多貨比我喎！仲急急叫佢條「靚」void 咗張單，又叫條執貨仔搬番Ｄ貨入倉。我見佢咁唔睇我枱戲，梗係同佢札哂馬啦！以下就係同佢嘅Conversation。「粗口字用X字代替」！

我:我都比x緊水啦，係咪咁都唔x比面呀？有冇攪x錯？
佢:(見我咁火滚都冇讓步)依Ｄ係公司規矩，边個都面比！everybody is the same.
我:乜x嘢公司規矩，你講x晒啦！
佢:你買x晒我地Ｄ貨，我其他Ｄ客黎就会冇x得買！点义樣對佢地交x代呀？咁對佢地唔x公平喎！
我:佢地又唔係依义到，你即係生人霸死地啫？對我公x平咩？
佢:唔理点x樣，公司話x咗唔可以比晒一個買x哂！
我:(終於明佢阿媽諗乜x嘢嘞)你即係話唔x我一個獨「趙」哂Ｄ貨啫，唔想我獨大啫？
佢:(見我踢爆咗佢Ｄ陰謀後，有少少歉嘞)對唔着先生，I am just doing my job.如果有投訴，你可以.........

咁樣情形，我都冇計，唯有找數鬆人。

之後，我就諗，係香港，我依Ｄ客就最受歡迎最易做。一「高」買晒，一張單過，收一次水，恨都恨唔到咁「正」嘅客。但係，係歐美國家就完全唔同諗法，所謂有「反壟斷」法喎，有錢揾唔可以揾盡，留番Ｄ比人揾吖嗎！但係我嘅問題係，好多懶人係有錢都唔願去揾，我去揾時有人又「眼紅症」起，驚我揾埋人地個份啫。其實依樣畸型社會現象已經在歐美社會存在咗好耐架嘞！自從歐美大國係上世紀經濟起飛，賺咗(或搶走)人地一大筆後，終日好逸惡勞，不事生產。當人肯做肯捱，迎頭趕上時，Ｄ友仔就諸多刁難，怕人有朝一日威過佢，于是乎禁着你，唔比你上。攪乜鬼公平競爭，反壟斷等等。其實只不過係「美其名，保其位」嘅一Ｄ牛鬼蛇神阻人發達得以自保之垃圾橋。

註:粗口係我係個心講，同特別為個對手加插。

二女汶汶

本來個標題係用「次女」曉汶，但諗來諗去，個「次」字總係有少少貶意。好似次貨，次級和次等都唔係最好意思，所以決定唔用個「次」字！其實個個女兒都係咁宝貴，咁愛錫。何來等級之分呢？外國人係依方面就冇嘞，只有用年紀來分。好似Big and small 和elder and younger諸如此類。中國人傳統上生孩子比較多，又加上長幼有別，於是乎有用數字來分尊悲，從而洐生出不必要的麻煩。時移勢易，中国早前推行「一孩」政策，相信這已不是問題。但「一孩」就為社會帶來更大問題‧容後再談。

汶汶生於2003年六月十六日早上英國Wilmslow市。


那年，我媽媽也老遠從香港來看她出世，三代同堂。曉汶這個名是忘父相片前改嘅。事原Helen 同我心裡有三個已定的名，曉「汶」、「利」或「琳」但決定唔到边個最好。於是，媽媽將個名用三張小字條寫好，拿到爸爸相片前，一路拋一路叫爸爸「顯靈」去抽，終於掉出黎嘅係「曉汶」。至於個英文名Melanie就係當時只有七歲嘅彤彤改嘅。


汶汶一出世有八磅多重，係較肥，加上日後喂人奶同汶汶好肯食，好快就好似吹波仔一樣，由頭至身都肥起來。大約五六個月，Helen 決定由人奶轉奶粉，初初係冇乜事，但係餵咗幾日問題就黎嘞。汶汶個身Ｄ皮膚都起咗Ｄ紅疹，佢自己都識用手仔去抓，想一定很癢！於是快快趣帶佢去睇医生，好快就診斷佢係有濕疹(ezcema)，對牛奶或牛奶產品有敏感。咁嘅情形梗係要Helen餵番佢人奶啦，於是汶汶一路飲到成歲大先戒，咁反而得到最好的營養。戒咗人奶之後就一路飲鮮豆奶飲到而家。到現在佢對牛奶已經唔再敏感，可以同其他細路仔一樣食雪榚等奶類食物。但係花生同貝殼類產品都係有少少過敏！

汶汶又好奇怪，佢又不會呵索要食蝦蟹貝類，自己懂得自己迭擇退避。小小年紀就会詢問食物有冇含致敏原，好鬼精叻！

由於汶汶有此先天小弊缺，作為父母就好似稍欠佢一点，我對佢冇縱但特別愛護。汶汶可能被我愛錫有加，佢又特別嬌滴滴，比起小她歲半的嵐嵐來得更女仔更嬌嗲。

另外怪嘅事，汶汶係用左手嘅。Helen那边冇人用左手，而我果边亦都冇。相信佢係第一個嘞！汶汶生得比較高大，着嘅係外國同年紀大的衣服。彤彤，嵐嵐就要着小一歲嘅衫褲。故汶汶有「肥妹」之花名。

可圈可點

今天同大家分享吓以下Ｄ諗法，我就覺得好有意思，特別係對當時講者而言。啱唔啱聽就見人見智，歡迎批評。

唔願去揾錢嘅人特別喜愛錢。-----我自己。

成功嘅男人係好寂寞。-----廖仲敏，我的生意伙伴。

I just take what you think I am. -----Patrick Luk, my mate at university 對「騎離怪」師兄弟的回應。

有信心未必贏，冇信心必會輸！-----着名演員劉德華。

人類將來貧窮到只剩下「錢」。-----前天文台長林超英。

Quit 好容易，留低就好難！-----董建华比立会員狂插時回應。

男人要七分正三分邪先至「正」。-----Michael Loong，舊DHJ同事。

I will never let people walk over me again-----我自己係九十年代尾失意離開某大機構時講。

You don't win a silver but lost a gold-----教練對開心贏咗「第二」嘅日後奧運金牌得主Carl Lewis講。

「風声，雨声，讀書声，声声入耳」
「家事，國事，天下事，事事關心」-----東林學院對聯。治世之道。

'Some people live to live, I live to enjoy.'-----Mr. Galligopi, my friend from Phillippines, who smokes like a chimney.

'To live a life that is full'-----lyrics in 'My Way' sung by Frank Sinatra.

〝份糧就跟月經一樣〞一個月黎一次，一星期就冇哂-----某人係fb posted嘅。

英國夏天

每年三月最後的一個星期六晚，又係英國夏令時間開始嘞。咁樣冬夏季就特別分明了。

英国冬季在十二月裡夜長日短，早上八時先至天光，而晚上三時多就黑嘞。夏天就剛剛相反。六月時候，早上四点就出太陽，夜間成十一時先至黑齊。比人覺得夏天成日留留長，冬天就唔駛一陣間就要捐番入被竇訓嘞！咁樣夏天就成日有得玩，冬天就要終日室內活动。

我家的後園，起咗個玻璃屋(conservatory)。依間玻璃屋連接主屋，依靠側牆興建，可以由屋直接行入去。話就話Ｄ牆、屋頂係用双層保温隔声玻璃牆做，其實跟間主屋溶為一体，唔講係「加建」，可能無乜人睇得穿！

一踏入四月，夏令時間到，個間玻璃屋就係我二個細女的小天地嘞！間屋約二百平方呎，麻雀雖小，五臟俱全。每當早上或下午有太陽時候，間屋就特別温暖，有時仲要開着風扇添，舊年盛夏，曬庆咗時，有成50c連支臘燭都焗到变咗灘臘。汶汶和嵐嵐玩煑飯仔，公仔，砌圖，甚至做功課都係間玻璃屋裡。有時打開道扇門，屋同後園連接上，同大自然擁抱一起，更樂在其中，chill out 一下。

風和日麗的英國夏天真係美極了，四處綠樹林蔭，青草黃花，温暖乾爽，清風吹送。比起天气酷熱和乾燥的英班牙和莆萄牙來得自然、雅絰、綺麗。我常常跟朋友講，如果英国夏季可以維持咁樣藍天白雲，微風温和嘅天气，就唔駛每年有數以百万計嘅英國人外出旅行，和成千上億万磅流向南歐諸國嘞！可惜英國天氣失魂，許多時都是密雲微雨，有時仲吹起強風添。試問有边個人會將自已一年一次的暑假同依個「五時花六時變」臭皮性嘅天气打賭呢？於是乎，每年七，八月英人都會蜂湧南歐渡假，儘飽冇乜機会接觸到嘅陽光海灘嘞！

麗池大飯店

昔日「麗池」大飯店位於佐敦道與白加士街交界的角位舖。即現在麥當奴地面入口大單边附近週边地方。六十年代，七十年代初為佐敦區有名食肆。幾時開張幾時結業边個係老闆，我就無從稭考了。


「麗池」名字源自英文的 (Ritz)。依個字在歐美酒店飲食业中極具盛名。中環的 Ritz Charlton 酒店。都係用依個名。昔日麗池跟這個酒店集團冇有關係，我就唔清楚嘞！


飯店不豪華但好蹅實好Welcoming。兩扇大玻璃掩門配上兩個木制大牽手，門上各掛上白色呢士布，十分雅緻。傳統典型舊上海飯店裝飾。店分二層，一進去大堂就是一個開放歐陸式嘅Delicatessen，賣嘅全由自己厨房制作歐式cold cut， savoury 飽点小食 ，疍糕，麪包，自制糖果，朱古力，鳥結牛奶糖等等俱全，琳琳種種，目不暇給。今日的甚麽大酒店，Seibu，龍島或 City Super 都可能比了下去。最吸引兒時的我，就莫過於那一座大型燒烤炉了。一隻隻的燒春鷄被掛著一排排，個炉慢慢轉动，將Ｄ嫩春鷄由下至上循環再轉咁，用約四十五分鈡時間烤熟。然後放於保暖柜售賣出去。細路仔嘅我老是呆呆看着，尤如看「摩天輪」似的。


走過Delicatessen後，就是接侍處。侍應白色中山裝，經理黑色西服黑領帶。桌上永遠有白布枱布和白布歺巾，簡潔整齊絕不花巧。永遠是經理專接待應酬，和侍應只服務料理，分工合作，有規有矩。餐具方面十分注重，有文有理地細緻編排。主歺刀，排刀，麪包刀，魚刀，小义，大义，湯匙，甜品匙都係是乎甚麽菜式由外至內編排有序，不會出錯。麪包碟，熱碟，和底碟都是少不了。單單坐下來喝的那杯清水就殊不簡單。侍應用白布護着外有冷水点的厚不銹鋼盛水瓶，為你倒蒸餾水進水晶亮丽的高身玻璃杯中，瓶內有冰但冰卻被窄瓶口分隔，不會滾入杯中，用心良苦，籍得一讚。蒸餾水冷而不冰，入口清甜。


爸爸愛帶我們一家八口去丽池食飯。但，如果同媽媽倆口子去，就一定去過咗條佐敦道，位於吳松街那間剩係聽個名就知鬼馬浪漫嘅「紅香檳」喇！貪佢夠清靜和燈光暗是也。


丽池做的西菜正宗，種類不多但精。用料上乘。烹煮工夫了得，別於當時的「西餐中煑」食店。三哥愛吃且多，每次都是点全餐。「全」乃有別於「常」餐。「全」有七道菜而「常」則只有四或五道罷了。爸爸愛吃牛脷會意粉，媽媽則喜焗豬扒飯，大碟抵食，大姐鍾意吉列豬扒，鬆化香口，四哥和妹妹卻最愛那飯後甜品。


二姐和我則特別喜愛那道「周打忌廉魚湯」(Cream of Fish Chower)。此湯非常人諗嘅一般歺湯，並非凡品 (NO Mickey Mouse Stuff)。丽池做和出依道菜嘅舖排，質量和服務水平細緻程度，到今日，我都未揾到一間飯店餐廳可以跟它一比長短。首先，個侍應老遠由厨房推架餐車到我身边，先放在我面前係隻熱湯碟連底碟，左手旁放下小麪包碟和牛油小刀，湯匙放在碟前边，碟前端上一小籃子自家制白和麥餐包，加埋一小銀碟的手捲粒狀牛油，鹽和胡椒粉樽。好啦！戲肉登場。侍應小心地端起一個圓疍形嘅銀湯盤連蓋，打開它後，慢慢為我添上一匙又一匙由新鮮魚塊加忌廉煑成濃而清香的周打魚湯，每一匙都有湯有料，這時我心中的喜悅、盼望和食慾都漫不经意地经口水偷走出來了。當隻碟盛滿後，侍應礼貌地請我用饍，並留下那還盛載着餘下足有一碟湯的湯盤於我身边，好像看穿了我那份一碟「仍未滿足」之念。


我家並不富貴，但爸媽經常與我們外出用饍。旨不在「食飽肚皮」，而是為想我們增廣見聞，認識各樣新奇事物，緊貼社會節奏，提高我們的素質。多謝您，爸爸媽媽。

燕梳與你

昨天，有段新聞係関於一宗燕梳嘅。英国有個十七歲嘅新牌仔，一考到牌就去買咗架二手車，价值只係三仟磅，約四万港元。係乜車？英國無線衛星台就冇講，但我相信係架跑車嚟。最貴嘅一份燕梳報价居然貴到要三万三仟磅(折合HK$380,000)。條靚仔梗係唔制啦！足足問咗十多個報价，好多份都係要十多万港元，而最平嗰份都要成六万港元。問你哋班新牌仔点頂？据聞，燕梳佬Ｄ精算師話，全英30%嘅交通意外都涉及十七至二十五歲嘅司機組別，尤以男性為多添！

燕梳公司要賺錢，係好天公地道。但係賺幾多？係咪合理？Ｄ大粒老細年終獎金幾多？條數点計？有冇監管？有冇忠於對人，對社會責任呢？我係依到真係唔知佢地点做！但我想，作為一個年花十多万元於燕梳上嘅消費者，講吓我對依Ｄ「唔買唔得，買咗又唔知得唔得？」嘅燕梳感受！

二年前，我架三噸半van仔就係自己貨倉門口比人揸走。有晒錄影見到個賊，買齊燕梳都係冇得賠。燕梳佬話，我架van 仔雖然在私家地方被偷去，但我公司要負責，因為個賊冇Force in 架van，而條匙冇被看管得好同架van冇被鎖好。所以對唔着一声就了咗去唔賠嘞！

跟着就係個用嚟放啤酒個貨倉嘞。雖然到而家都冇事，但係自上次架van仔件事冇得claim之後，我都好担心自己有冇做錯Ｄ措施同燕梳條文指定嘅有出入。首先個度鉄閘鉄門，設計要跟佢嘅要求，防撞防火連物料門鎖都要合符英式「乜丫」型号等等。個防盜警鈡仲誇張，跟据貨物价值一路提升，甚麽level 1 to level 5 ，仲要合符英國標準等等。仲未講完，剛才所講都要有合約維修保養公司定期檢查以確保Ｄ門閘警鈡正常運作冇受天气人為損壞。最好就係將個Alarm直接駁去差館，要差人係幾分鈡內到現揚個隻。講到尾，每一樣嘢都要錢，每一樣嘢都拉上另外一樣嘢。一樣做錯全部都錯。亦則是「一子錯滿盤皆落索」。我只不過係一個普通商人，又点會有咁多料去仔細睇個Ｄ條文細節disclaimer 之類嘅嘢。就算識睇，都冇專业法律知識去理解啦！叫個律師睇都可能要燕梳佬指定個間都唔定？

講番屋企。個中央熱水系統壞咗，滿以為買咗個Home Emergency Plan就冇事啦！誰不知唔係好似我諗得咁天真。保就保嘞。但係保之前，個熱水系統要年年有註冊技師保養維修先。換句話，個系統要百分百健康運作正常佢先保。個炉咁「正」我仲駛佢保咩？

又講埋個菲律賓人質事件中生還者易小玲小姐。佢受傷嘅情度大家有目共賭，除咗要照顧孩子自己生活外，仲要面對一筆巨大医療外科手術費用。到目前，無線新聞透視稱易小姐因唔係永久傷殘或完全失去工作能力，係冇得全數賠償。易小姐只不過獲發放約一万元保償。

我相信好多中國人買今燕梳都係「被要求」嘅。對其「真需要」程度係好低。好似旅遊保，保費只不過一個午飯咁上下，好少人會坐低嚟睇吓究竟賠Ｄ乜？同埋乜嘢情形下先至受理！咁樣就做成有Ｄ「騎離」燕梳佬「得過且過」去賣燕梳嘞。如果捉着個受保人同佢解釋，反而比佢話多爹阻着個地球轉啦！咁亦唔可以完全怪罪哂承保人嘅！我嘅情形亦相似，如果唔係架van被偷咗，個暖水系統壞咗等等冇得賠，我都唔會乖乖哋細心睇吓Ｄ細節條文究竟係点！講真，双方都要對份保險有責任，但係我總係覺得Ｄ條文好似無形陷阱咁，你要小心唔好跌落去(fall victim)。我地係消費者，好誠實地(honestly)買份保險，目的保障自己性命財富，最後都係唔想自己去claim 嘅！但係燕梳內裡繁複細節，加埋一Ｄ有心「裝彈弓跣人」無良無道義嘅營商者係到做「那渣」手腳，往往令到我地「賠了夫人又折兵」，雙重損失！
本來燕梳嘅慨念係「鼎瓜瓜」。將個人的無妄之災，由多人分担。當然冇人想付出少少保費後將來唔好彩獲得賠償。唔好彩時，個Ｄ賠償就幫佢「番身救命」嘞。但係就是個Ｄ寫到刁難狡猾嘅條文令到應得賠贘嘅人冇法如願。個班經紀燕梳佬，冧你買時就話得，得得，乜都得，買咗後就諸多刁難，不斷加保，等到有事要claim就同你講故仔。當然啦，燕梳佬後面大把公証員同你抽絲剝繭咁睇你有冇違規做錯，冇心之失，唔係老老實實睇吓点樣幫你喎！咁嘅情形，你勢單力弱，加埋之前意外打擊，試問你点同佢「抽呀」？輸梗！

自從金融海嘯後，我對燕梳理念仍然贊同，但對佢地是否貫徹實行依個理念就完全被摧毀。燕梳公司可以用數以億計去投放廣告，大手派發高層花紅，重金厚賞營業經紀，導至不良不實的推銷手法，最終受害人不獲賠償，屢見不鮮。

政府要我們市民係生活上許多多範疇買強制燕梳，但又唔去做監管，攪到燕梳佬個個為业績為花紅，妄顧受害人利益，賴理他人死活，來令自己從中得益，實是悲哀。

我成日覺得依個問題咁切身咁嚴峻，点解政府，又点解個Ｄ口水狂噴嘅立会議員唔企出嚟講番Ｄ有建設嘅又幫到人嘅嘢呢？係咪又係以自己利益為大前題，「迭擇性」為民請命呢？

愛吃的爸爸

昨天畧畧講咗少少關於爸爸的趣事，懷緬一下佢的生平，和兄弟姊妹分享点滴或未曝光的軼事。

爸爸愛吃，眾所週知。特別喜愛肥利食物。如燒腩肉，五花腩，牛腩，羊腩，魚腩，逢腩都啱。佢話食物不帶肥膏係唔好食。凡蒸魚炒菜，用油都比別人多。油多了就放多Ｄ菜落去索番Ｄ油，到Ｄ油少咗，又放番多Ｄ油落去。就係咁樣遁環不息，不停地食。

有時媽媽怕佢食滯出声叫佢小食一Ｄ，爸爸一定話「你估依Ｄ係『仙丹』咩，一食有事？」籍此推搪，繼續佢嘅吃的事業。

我有時都会親手做些菜給他食。好似紅炆班頭腩，柱候牛腩，南乳炆豬腩等菜式。爸爸最愛吃那個班頭，但又吃得急，有時都会哽親，所以對此菜又愛又恨。

記得八十年代尾，我剛剛畢業找到工作，為庆祝，我到街市買菜做飯。走進街市，先睇睇今日有Ｄ乜好嘢先。行去相熟魚檔，先見到人頭湧湧，都唔知係乜料？八卦走去睇吓，原來係今日生劏「大蘇眉」是也。Ｄ人唔買都去八下。漁販唔怕Ｄ人阻佢做生意喎！第一咁嘅場面好少有，就等大家一齊開心吓。第二，橫掂條魚個頭，尾，翅裙，魚內藏等都比為食老饔訂下，正式所淨無幾啦！快Ｄ賣埋收檔。

我見到有一兩個客，散買魚身橫切片，都要二三百先有計傾。於是乎個心「鬥爭緊」好唔好買嘞。再走一個圈，想起爸爸名言「若食海上鮮，莫惜腰包錢」。的起個心肝就返去買。叫個漁販切一片啦，並醒多佢一句「係咁意，小小地得嘞」。個漁販斜視我一眼兼眼帶不屑下，手起刀落切過去。我就即刻諗「駛唔駛成寸厚呀？」。礼成後，個塊橫切片〔洋人叫Steak〕足有一寸多厚，中間舊背脊骨仲大過個五蚊銀，平放落隻大「鵝春碟」到，隻碟都冇位剩。可以想像到有幾大塊嘞。好嘞，找數時間到，漁販話二百多Ｄ啦「後生仔」〔唔通知道我買黎孝敬父母〕，收實二百啦！個陣時我份人工係6500元一個月，成日人工黎架啦。

返到屋企仲比阿媽話我比人喔添。典型慈母。個晚，用薑蒜葱花豉油皇清蒸。肉嫩骨香，味鮮汁甜，人間極品是也。爸爸吃得不亦樂乎，報以「嘟嘟声」讚好！

至今，每次有好嘢食，我都覺得欠缺咗一樣嘢先至完美。就是爸爸那一份對食的酷愛和與他一起的熱閙。若再有機会給我買多次「大蘇眉」，我定不猶豫不決，無論二百，二仟，我都会買下來。

爸爸生平拾趣

昨天就短短講咗爸爸的生平背景，等我Ｄ朋友對他一生有小小認識。昨天文章寫得比較嚴肅，而今天就要寫得較輕鬆，無他，等你哋有多少趣味。

首先，先講佢個名。我都話，佢出生清貧，冇乜讀書，理所當然就連我嫲嫲都冇啦。一定唔係甚麽大戶人家，含着銀匙出世嘞。咁点解有個名咁清丽叫「秀」呢？以前窮人唔識字，個姓梗係一路跟亞爺用落黎啦！但個名就点改呢？据聞嫲嫲唔知点改，叔伯父老都唔知，於是乎去揾寫信佬。依條寫信佬都係「也也烏」個隻，有人話改叫「壽」啦，取其意長命健康是也。於是乎一眾話好。但係問題黎啦，係点寫？個「壽」字都幾蝦人喎！寫信佬為多賺幾分錢，就騙人唔騙自己地用咗個「秀」字嘞！依個「秀」反而來得清雅脫俗，自然秀丽！其後爸爸亦引以為笑道：「我叫阿『秀』唔怕人閙唔怕『咒』」。後來人稱他為「秀」叔。

另外一則就係佢做咗老板後發生嘅。我爸爸好鍾意食，尤其係肥利嘢。身不高，体則胖。五呎四吋高差不多二百磅重。有人話：未見其人先見其肚。故亦有人稱他為「肥」伯。

我爸爸經營渡輪生意，見嘅識嘅人都好多。一天某陌生人來他公司找工作。

陌生人問：老板「瘦」叔在嗎？
伙計話：边有瘦叔呀？肥伯就有！
陌生人指着字條的「秀」叔話：冇錯，係「瘦」叔！
目不識丁的伙計不耐煩就話：渾吉，何來「瘦」叔只有肥伯！
後事如何就無從得知嘞！

但係，之後，我爸爸的公司就有兩個老板，肥伯和秀叔啦！

誠邀你認識我爸爸

我爸爸姓盧名「秀」。生於一九二五年農曆三月初六。祖籍廣東珠海中山灣仔鎮。生於动亂民國初期，家境極貧困。兒時因母周三無力供養被賣至澳門一漁家為養子，過着艱苦生活。

十一歲時離開漁家跟隨船務工人當上小學徒，自此與船務拉上關係。因其為人勤奮好學，肯幹肯做，不拘小節，於船廠學会一技之能，幫助將來事業發展。

一九四五年二次戰後，百業待興，他跟隨香港陳姓富商打理船務生意，並受重用，雖未受教育，由於他實幹性格，陳助其考獲船主〔駕駛船隻〕和大偈〔輪機修理〕香港牌照。除此之外陳亦助他發展事业。

五十年代，爸爸有了自己首個事業。業務乃位於昔日何東樓〔近沙田〕至馬鞍山之渡輪航線，接載服務村民。他人緣好，又仗義，很快又被當時理民府官員賞識。政府興建船灣淡水湖時，先知先覺的他為承建商提供快艇服務，為許多工程人員省卻住返時間。至七十年代，爸爸又進軍筲箕灣與調景嶺渡輪服務，其時船隊足有十多艘，員工有五十五人。

八一年，爸爸不幸患上直腸癌，手術康復後，再上征途，活躍拖輪生意。他熱愛中國，將造船工程交托位於江門的造船廠，排除別人對中國技術和品質歧視，貫徹始終，開拓港人投資內地先河，成為行內佳話。八六年，事业巔峰，被選為港九电船拖輪商會會長，實置名歸。

九二年後，淡出業務，逐漸售出生意，與妻子週遊列國，足跡遍及東南亞，日本，台灣及韓国，遠至歐洲，蘇聯，美加和澳洲，行遍中國名山大川。一嘗「讀万卷書不如行万里路」之願。他亦樂善好施，參與慈善活动，籌款義賣賑災等。後成為油蔴地街坊福利會永遠會長。

他與妻子何桂珍四九年結婚育有三女三子。內孫和外孫各五名。

爸爸愛助人，愛娛賓。昔日佐敦道伯爵酒樓四樓倣如他的行政會客總部。生意伙伴，親朋戚友都來吃喝談天，可謂「食客三百」，他對此來者不拒亦樂此不疲。

九九年頭，爸爸再患上癌症。经化療後未能痊瘉，於八月與世長辭，終年七十七歲。

生我非為我

「父母生我非為我，先有快樂後有我。」


這段對聯係我在香港九十年代工作時，在公司男厠厠格內看到的。相信作者不滿傳統中國家庭觀念或對父母子女傳統關係的挑戰。


其實細心去咀嚼，在問題家庭中，父母子女不和，為零碎瑣事，天天爭吵，你嫌我棄情況下，此對聯可能是子女對父母的悲哀控訴。現實中，的確有「生我非為我」的悲劇。尤以歐美社會嚴重，而中國和香港亦步其後塵，急急追貼呢！


我三個女兒就讀的中學和小學，就有不少個案。


有些問題孩子由幾歲至十多歲，他們是由社会福利處托管的。大多數是父母分開而双方又不願照顧所致、有些則是父母有糾紛導至家庭暴力下，社處介入暫托。此種情況，最受罪莫不過是孩子們，正正回應「生我非為我」的控訴。


我家六兄弟姊妹就很幸運，家庭雖不富有，父母對我們關懷備至，傾囊而出無私奉獻供給我們所需。我們亦對自己所出一樣看待。正所謂「有其父母必有其子女」。對於那些「懂生不懂養」的父母我恨之刺骨。孩子們乃國家社會棟樑，若連最基本父母之愛都無法給與，又怎何能談上裁培教育孩子呢？古語有云「養不教父之過」，暫且不提「教」先，父母之愛乃家庭之根源，人無「親愛」便談不上對朋友的「關愛」更不用說對他人的「兼愛」。


若父母們認為子女乃自己的「副產品」這樣你們就比隔鄰的「多利狗」都不如了！！

女兒的成長

長女彤彤今年十五歲了，次女汶汶差不多八歲，而幼女嵐嵐已六歲半。

昨天汶汶與嵐嵐為了兒嬉小事爭吵。兩個不約而同走去大姐姐處訴苦投狀。

在樓下的我正盤算地想，彤彤怎樣去應付這小糾紛。

小妮子並無指出那方是對，但卻講出双方不和吵架就双方都錯。並令兩小妹道歉双方了事。

汶汶一向從善如流，馬上道歉去了。嵐嵐性格倔強，不容就犯，於是乎哭起來。汶汶見狀亦覺自己不應一早道歉，內心不忿。到此時此刻，我相信形勢不妙，不知彤彤如何收科？

彤彤不慌不忙，說出以下說話：

「Hey, we should love each other, when mum and dad die we are the closest！」

此語一出，汶汶、嵐嵐倣然大悟。此情此景，温馨無比。

彤彤長大了！

仙台8.9級地震

今早送女兒返學駕車時收聽到日本大地震，心感不妙。事關連我們地區小电台也廣播，一定大件事。送女返學後立刻返家收看电视，無線衛星台開口就講緊地震對股市既影响同個大市点樣走勢，日元兌美元等等消息。最長環節係見到財爺出嚟講嘢，佢話都密切注意相關影响同有必要時出招穩定個股市。跟着就係保安局副局長黎楝國叫港人冇必要就唔好去日本和發出紅色旅遊警示等等。跟着就係旅遊議會既董耀中講那边港人点樣。我終於忍唔着依個約十五鈡剩係顧自己同埋錢既所謂新聞，轉台睇Sky News。一睇之下果然大件事。

首先見到ＤTsunami 巨浪一路入內地，無不摧毀。威力之大所向披靡。車、房屋、橋樑、建築物都一一被推倒，一排排跟着巨浪湧入內陸。看到气車行人想走避，但一個一個被吞噬。親眼目睹那些人慘被巨浪捲走，毫無援助，生還渺茫。心頭一酸，双眼也紅了。這時亦聯想到兩年前汶川大地震的慘況。頓覺自然災難威力巨大與人類生命的脆弱渺少。

「2012」那齣戲講及世界末日來臨，先行多災多難。莫非一一應現？人類是否可以補救呢？還是為時已晚呢？還有一年到2012，我們應好好想一想了！

縱愛父與孝順女

一天，年屆八十慈父對遠居海外生活，環境不濟的孝女道：

父：我比机票你返來探我並過年啦？
女：淨得机票，我無錢在港洗用！
父：多吡一皮好未？
女：返到嚟，有咁多叔伯兄弟、親戚上上下下，点都要派少少利是喎！
父：出多五千嘢夠未？
女：番咗香港，間歺樓少咗生意又要請人做替工！
父：加多二皮滿唔滿意？
女：或者都會夠！
父：好啦，得的話，就住多一二個星期啦？
女：咁你比我Ｄ錢就唔多夠嘞！
父：〔有点激气〕比埋副身家你好唔好？
女：〔好有道理〕不過你要責任你方律師費。

我特地誇張了以上對話，但情節和孝順女的論據確是真的。外國人或外國長大的都覺得慈父硬生生imposeＤ嘢係孝順女身人，理所當然要負責一切相關帶來後遺事啦。並無唔妥。

「溝」字点解？

「溝」呢個字係香港廣东話嚟講，有以下最常用情形。

1. 溝女，溝仔，溝佢，唔受溝，溝唔到，左溝右溝，溝杯cocktail等等。动詞用。

2. 溝渠，陰溝翻船，乳溝。名詞用。

名詞用法嘅「溝」同將Ｄ液体混合一起嘅「溝」，唔駛我多講嘞，小學生都識。

但係点解去識男女要用「溝」字呢？相信好多人識用唔識解，更加唔知其由來。

依個「溝」字解法都係一名政府高官教我嘅。

「溝」源自英文动詞「cultivate」是也。取其音「cult」，亦用其意「灌溉，培養，扶植」。
十分之文雅精劈。故各位千祈唔好以為「溝」字係低俗下九流用字。

識男女仔後，稍後發展男女朋友，親蜜成熟便成夫妻。係咪要好似用水勞心勞力地去灌溉，培養，扶植呢？做事一樣，水到渠成，亦可以用溝。

若各人有其他異議，歡迎賜教共商。

政客的說服力

友人电郵了我兩篇短文都是關於香港官商勾結和政客在立會上的言行之事。目的，若如我所想，該是勸我多了解內情，再作批評。羅輯上是對的。但我在昨天的短文所講不是政治觀点對與不對，而是我絕不贊同他們的立會言行和暴力文化。(請翻閱昨天短文)

假設黃，陳和梁三位的政治觀点是正確，有points 又有grounds，有理据有支持先。既然有料到有嘢撑。咁樣佢地係咪要去sell 比人先？等人支撑佢地為之上策呀。老實說，以佢哋三人尊容外表言談舉止，已经賣点不多。許多港人包括我在內，由冇乜，至有少少過得去環境嘅，遠到好有環境嘅都覺得佢地〝攪事〞和〝唯恐天下不亂〞。天天在怨天怨地，罵東罵西。既然我哋依班人已經唔Like key他們，再加上佢地在立會上的表現，咪即係叫人「落閘放狗」拒他三人於門外，最好睇埋佢地跌落海添，仲要唔好浮番上嚟。

其實好多港人，有料嘅冇料嘅都肯接受正確意見和合理訊息，亦即是second opinion and constructive ideas。不然香港点可以由小小漁港，短短百多年变為世上金融中心。問題係你点樣点醒佢，sell 到佢啫。一嚟就呱呱叫，未見其利先見其害。盲嘅都唔buy他們三人啦。咁嘅情況，有人如我咁話佢地disgusting，又怪得边個？依個世界，尤其香港，無乜边個有時間有耐性去研究你黃、陳、梁有幾多政治理想和Ｄ理念真係行唔行得通架？

由小學生去考名校，男去溝女，畢業生去求職，周星馳投考無線，slaes佬去賣燕梳，fund佬去叫大老細買基金，殺人犯上庭求情，至去年英國首相卡梅倫到中國找商机。第一眼，個first sight 十分之crucial 。通通一切一切都在於二個永恆不變嘅字sell and buy。亦即係「溝」同「冧」嘞。

真係好實在架。你賣我未必買。你溝我，我唔一定冧你。咪即係白費心機。冇utility囉。

佢哋三人嘅流民表現，話佢地有料做得嘢，你搾支槍指著叫我去信我都話唔信啦。去sell人，起碼似番個正常人先。唔係口大大声粗粗就得架啦。尤以黃先生為甚，以為有丁点兒背景就打橫行咁，最乞人憎！因我最憎Ｄ人持惡行凶。

試問吓，緬甸個昂山素姬，南非個曼德拉边個唔係講嘢時温文雅爾，有條不紊呢？我哋自己個「温總」係汶川時表現咪嬴得國人景仰囉。就算係最巴閉嘅美國一哥奧巴馬都唔似他們三人咁口沫橫飛，有佢講冇人講。

話我思想封建守舊都係咁話。依三個人應去讀吓salesmanship課程先，然後再去立會再戰江湖啦。到時你sell 到我，我一定buy架。因為我都係一個sales佬。

暴力立法会

我就唔係好懂政治。但我則覺得百分百之民主在香港越來越行不通。

越多自由比一些利用人權的人，他們就將之濫用(Abuse)。

黃毓民，陳偉業，梁國雄成日以爛凶人，在立會上做馬騮戲。第一，娛人。第二，爭票。正一下九流低劣粗皮行為。

我在香港做咗少少民調，冇乜人鈡意依班垃圾。日日係處喊喊罵罵，毫無建設，成事不足敗事有餘。佢地又唔係好似歐美的在野党咁咩喎，反對還反對，会作出提議建議。等大眾可以作出比較，以補長短。

依三條友，淨係識罵。而家仲用埋掟蕉掟垃圾。如果我仲唔出声，有朝一日會掟通渠水或吐啖口水比人歎。都唔知点解迭民會迭佢地。父母都有教我哋「君子动口不动手」。依班所謂立員究竟知唔知有「唔好大教壞細」嘅道理。

台灣立会之亂在外國眼中已臭名遠播，香港仲跟著衝埋上去。都唔知有乜道理。

所以好難怪我地諗，依三條友就係想「娛人可爭票，掟蕉高声望」嗎？

為香港做嘢，先先做好自己。唔好攪到自己有個Messy life。修身、齊家、治國。平天下就遲些再談，同埋睇你哋点做化嘞。

点解要禁煙？

我唔係一個煙民，但一年裡面，總有十次八次同班友人聚吓，都會煙不離酒情況下，享受有少少麻醉下的談天說地。不抽煙的人無法感受到這個飄飄然的精神狀況。這個就是我想在此道出的安全，理性，不影响他人的合法social activity。

安全。不會危害即時人生性命。理性，吸煙多咗唔會發癲去攪事打架。只會Relax。合法，煙是政府批准，打足稅的，去吸食無唔啱。Social activity，成班人聚埋一齊，梗係做Ｄ有共識，志同道合既事啦，相信吸煙，吃喝玩樂，唱K吹水等等係呢個環節肯定score 好高。講到依度，無他，就係想講，吸煙係一個理性享受。

政府話吸煙危害健康。想想飲酒為害更甚。drink and drive, 打架等咪仲衰。酒亦傷身。在英美歐洲有許多domestic and social violence, football holiganism (足球流民文化) 都同飲酒過多有直接關係。最近英國洒吧和球場都少用玻璃樽和杯，目的是減少打架時的傷害。酒的為害可見一班。再者，「享受」一族認為有些人係「live to live」為生活而生，而他們就係「live to enjoy」為享樂而活。

政府做嘢彈弓手。首先政府要介定(define) 食煙係乜先。我想它從冇諗過。我和大多數煙民就覺得係享受，更甚者係需要。又要賣煙又要打稅，但又要諸多打壓，其實係過份打壓。咁樣做咪即係開「唯色」仲係一票獨得嗰隻添。莫視煙民意。公共場所內不准，室外好多地方唔准。正式要「企街食」。風吹雨打，烈日高温抑或寒風刺骨去「企着食」都係你吸煙者之事。

本來局限一個地方吸煙好合理，例如吸煙區或娛樂場所有exemption 等都行得通。但政府一刀切。一支竹打一船人，全部打晒落海做法。攪到煙民要用逃避方法去「享受」。係依個情況下我本人以尊嚴為大前題，決定唔屈膝去食煙。同我宗旨social activity 已背道而馳。

其實想攪到個双贏局面，技術上完全冇頭痛。吸煙房，完善抽气，愛吸煙者當侍應(收多Ｄ人工)咪可以解決啦。再者business operators 咪收貴Ｄ嚟補償額外開支，又或者政府向operators 徵收多Ｄ稅囉(如：保障員工有個靚肺稅etc等等)。相信用者自付好合理。起碼比煙民有得迭擇吖。

我無數字關於庫房向香煙抽多少稅，但我相信一定數以十億計。依Ｄ咪係煙民的社會責任和負出啦。正所謂「it keeps the economy running」。冇咗依Ｄ稅，庫房收入一定有打擊。

有人問：如果丈夫在房內吸煙而老婆又不准，報警。最終点收科？有冇人話我知呢？

香港地少人多，居住陝窄。想找個「咫尺」地去享受吸煙真困難。唯望政府去為煙民compromise 一吓啦。等香港唔好咁多怨气分化。和諧共處吧。

Hello

剛剛建立個blog, 都未諗到寫Ｄ乜。不如同大家問声好先啦！稍後再談。