剩女盛女

又係時候要同香港班「騎離怪」傳煤發吓炮，等佢地知道唔係剩係得佢地講冇人講，挖人瘡疤，愚人娛己，嘩眾取寵地將一些社會現象去千倍万倍負面放大，加料醜化，用盡一切污糟邋遢手段去搏取觀眾讀者，增加銷量收視和大收利益回報。


首先要揪出講依句「剩女」名詞嘅契弟出黎先，打完心口打背脊。依條友真係天才或白痴！天才係有班白痴追捧佢，佢利用其他人嘅無知愚昧，人云亦云，羊群心態，缺乏中心思想和同佢一模一樣低劣行為嘅人的心態，大做文章。白痴嘅就係好彩仲有班人用良知去睇清楚件事，踢爆佢無聊低賤嘅行為！


「剩女」依個名就真係用得低劣，剩即是多咗出黎或者冇人选擇而被遗棄咁解。我極相信「剩女」是指後者，即是那些女仕冇人要咁解，而最有問題嘅就是係点解只有班男人去選擇而女人係乖乖地被「間」呢？乜無人覺得依個「剩女」对女仕們有其恥大辱咩。班豬狗重講到津津有味，街頭巷尾的城中熱話添！最可笑就係被「間」咗個班女嘅，重向自己同性取笑添！直頭當自己係一件貨咁，洋人謂之 (commodity)


社會進步，而家女仕受過教育，有主見，具智慧，懂分析，思想開放，財政獨立，甚麽「從一如終」，以往的「三從四德」都會從新思量其对與錯，不會馬夫馬夫地「照單全收」。男擇女，女亦選男，好公道。我自己係都係男人，但目下嘅男仕真係「間」唔落手，唔好話有乜成就嗱！連顧掂自己「三餐一宿」都成問題，試問Ｄ女仕点樣同佢出黎襯，唔好講咁遠話「過人世」嘞。重話比佢間喎.....真係開玩笑，荒天下之大茂！


香港女仕受西方思想影響深遠，好耐已經唔受阿爺個套，「黎明即起，打掃庭堂，要內外整潔....」相夫教子去做人架拿。加上財政獨立穩建，唔再要男人養嗱，佢養個「玩具男」都仲得喎！單親家庭亦見慣見熟，有乜話唔可以呀？在西方買種，組織單親家庭已司空見慣！


現今社會女權大大提高，唔係男性下放權力而係女仕們不断努力，為自己爭取回來的。香港的表表者有政界嘅前政務司陳太，前立法會主席范太和仲活躍政壇嘅葉劉淑儀。商界有匯豐女大班。法律界有梁愛詩和李志喜。個個都有驕人成就，唔係得個「齋噏」！
「剩女」應該改為「盛女」嗱！芳華正盛也！


「剩女」依個詞就只有市井之徒掛在口边，無所事事，向人評頭品足，食飽等上厠之無聊輩的話題罷了。